اسلام آباد (مانیٹرنگ ڈیسک )آرمی چیف جنرل عاصم منیر نے کہا ہے کہ سانحہ پشاور کے ذمہ داروں کو نشان عبرت بنا دیں گے ۔نجی ٹی وی کے مطابق آرمی چیف کی زیر صدارت کور کمانڈرز کانفرنس ہوئی جس میں جنرل عاصم منیر نے کہا کہ دہشتگردوں کو انصاف کے کٹہرے میں لائیں گے ۔ پھولوں کے شہر کو خون میں نہلانے والوں کو کسی صورت معاف نہیں کریں گے ۔آئی ایس پی آر کے مطابق آرمی چیف نے مزید کہا کہ بزدلانہ کارروائیاں کسی بھی دہشتگرد تنظیم کیلئے زیرو ٹالرنس کے ساتھ عزم کو مضبوط کرتی ہیں ۔ ایسے بزدلانہ حملے قوم کے عزم کو متزلزل نہیں کرسکتے ۔ دہشتگردی کے خلاف جنگ کامیابی سے جاری رہے گی ۔آئی ایس پی آر کے مطابق کورکمانڈرز کانفرنس میں شہداء کو خراج عقیدت پیش کیا گیا ۔ عسکری قیادت کو دہشتگردی کیخلاف جاری جنگ اور امن و امان پر تفصیلی بریفنگ بھی دی گئی ۔