راولپنڈی (این این آئی)خیبر پختونخوا کے ضلع کرم کے علاقے اراوالی میں دہشت گردوں اور سکیورٹی فورسز کے درمیان فائرنگ کے تبادلہ میں 2 دہشتگرد مارے گئے، پاک فوج کے 3 جوان شہید ہوگئے۔انٹرسروسز پبلک ریلیشنز (آئی ایس پی آر) کی جانب سے جاری بیان کے مطابق فائرنگ کے تبادلے میں 2 دہشت گرد مارے گئے،
مارے گئے دہشت گردوں سے ہتھیار اور گولہ بارود برآمد ہوا ہے۔آئی ایس پی آر کے مطابق ہلاک دہشتگرد سکیورٹی فورسز کیخلاف دہشتگردی میں ملوث تھے۔آئی ایس پی آر کے مطابق شدید فائرنگ کے تبادلے میں پاک فوج کے 3 جوان شہید ہوئے جن میں صوبیدار شجاع محمد، نائک محمد رمضان اور سپاہی عبدالرحمان شامل ہیں۔ آخری اطلاعات تک سکیورٹی فورسز کا علاقے میں کلیرنس آپریشن جاری تھا۔ آئی ایس پی آر کے مطابق پاک فوج دہشتگردی کی لعنت کے خاتمے کیلئے پر عزم ہے، بہادر جوانوں کی قربانیاں ہمارے عزم کو مزید مضبوط کرتی ہیں۔صدر مملکت ڈاکٹر عارف علوی اور وزیراعظم شہباز شریف نے ضلع کرم کے علاقے میں دہشت گردوں کے خلاف کارروائی پر پاکستان آرمی کو خراج تحسین اور شہدا کو خراج عقیدت پیش کرتے ہوئے کہا ہے کہ دہشت گردی کے مکمل خاتمے کیلئے سیکورٹی فورسز اور قوم کی کوششیں جاری رہیں گی،پاکستان کی سلامتی کو چیلنج کرنے والوں کو کہیں چھپنے کی جگہ نہیں ملے گی۔ جمعرات کو ایوان صدر سے جاری اعلامیہ کے مطابق صدر مملکت نے شہداء صوبیدار شجاع محمد، نائیک محمد رمضان، سپاہی عبدالرحمان کو وطن کی خاطر جان کا نذرانہ پیش کرنے پر سلام پیش کیا۔صدر مملکت نے دہشت گردی کے خلاف قوم کے غیر متزلزل عزم کا اعادہ کیا۔ صدر مملکت نے کہاکہ دہشت گردی کے مکمل خاتمے کیلئے سیکورٹی فورسز اور قوم کی کوششیں جاری رہیں گی۔
صدر مملکت نے شہدا کے لواحقین سے ہمدردی اور اظہارِ تعزیت کیا اور کہاکہ اللہ تعالیٰ شہدا کے درجات بلند فرمائے اور لواحقین کو صبر جمیل عطا فرمائے۔دریں اپنے بیان میں وزیراعظم شہباز شریف نے ضلع کرم کے علاقے میں دہشت گردوں کے خلاف بھرپور کارروائی پر پاک آرمی کو خراج تحسین، شہدا کو خراج عقیدت پیش کیا۔وزیراعظم نے شہدا صوبیدار شجاع محمد،
نائیک محمد رمضان، سپاہی عبدالرحمان کو شجاعت و بہادری پر سلام پیش کیا اور کہاکہ دہشت گردی کے خلاف آہنی عزم اور ثابت قدمی کے ساتھ آگے بڑھتے رہیں گے۔شہباز شریف نے کہاکہ پاکستان کی سلامتی کو چیلنج کرنے والوں کو کہیں چھپنے کی جگہ نہیں ملے گی۔ انہوں نے کہاکہ قوم کی دعائیں اپنی بہادر افواج کے ساتھ ہیں۔وزیراعظم نے شہدا کے اہل خانہ سے ہمدردی اور تعزیت کا اظہار کیا اور کہاکہ اللہ تعالیٰ شہدا کے درجات بلند فرمائے اور لواحقین کو صبر جمیل دے۔
