لاہور (آن لائن) وزیراعلیٰ پنجاب چودھری پرویز الٰہی سے وزیراعلیٰ آفس میں صوبائی وزیر خرم شہزادورک کی سربراہی میں وفد نے ملاقات کی جس میں باہمی دلچسپی کے امور، سیاسی اورتنظیمی صورتحال پر تبادلہ خیال کیا گیا۔ وزیراعلیٰ چودھری پرویز الٰہی نے اس موقع پر گفتگو کرتے ہوئے کہا کہ پنجاب اسمبلی کے بارے میں عمران خان کا فیصلہ حتمی ہوگا۔

عمران خان کے فیصلے کا سوچ کر 27کلو میٹر کا وزیراعظم لرزرہا ہے ۔معیشت سنبھالنے کا دعوی کرنے والے عوام کا سامنے کرنے سے گھبرا رہے ہیں ۔عوام 13جماعتوں کے نااہل ٹولے کے ساتھ وہ سلوک کریںگے جو یہ پشتوں تک یاد رکھیں گے۔وزیراعلیٰ چودھری پرویزالٰہی نے کہا کہ خدمت کے ایجنڈے کو پورا کر رہے ہیں۔ن لیگی قیادت صرف جھوٹ بولنے میں ماہر ہے،جھوٹ بولنے سے معیشت نہیں سنبھل سکتی۔13جماعتوں کا ٹولہ مل کر بھی قومی معیشت کو سنبھالنے میں ناکام رہا۔ وزیراعلیٰ نے کہا کہ وفاق کی طرف سے پنجاب کے 170ارب روپے روکناقابل مذمت ہے۔گریٹر تھل کینال میں وفاقی حکومت نے پنجاب کے کاشتکار سے دشمنی کامظاہرہ کیا۔ صوبائی وزیر خرم شہزاد ورک نے اس موقع پر بات چیت کرتے ہوئیے کہا کہ چودھری پرویزالٰہی نے وزارت اعلیٰ کا منصب سنبھال کرمہینوں کا کام دنوں میں کیا۔ضمنی الیکشن میں 13 جماعتوں کے اتحاد کو ہرایا،عام انتخابات میں بھی ہرائیں گے۔وفد میں مسلم لیگ قائداعظم یوتھ ونگ شیخوپورہ کے سابق صدر وقاص حیدر ورک ایڈووکیٹ،انصاف لائرزفورم کے سینئر نائب صدر رمیز ورک،تحصیل نائب صدر فیضان مان، رضا فاروق واہلہ اورتنویر احسن ورک شامل تھے۔