واشنگٹن(نیوزڈیسک)امریکہ کے خلائی تحقیقاتی ادارے ناسانے انکشاف کیا ہے کہ سمندروں کی سطح میں 1992ءسے اوسطاً آٹھ سینٹی میٹرکا اضافہ ہورہا ہے اور ادارہ کے سربراہ چارلس بولڈن جونئیر نے کہا ہے کہ دنیا کو سطحِ سمندر میں ہونے والے اضافے پر فوری توجہ مرکوز کرنی چاہیے۔ انہوں نے کہا کہ سمندروں کی سطح میں اضافے سے متعلق سامنے آنے والی حالیہ معلومات قابلِ اعتبار ہیں جن پر دنیا کو سنجیدگی سے غور کرنا چاہیے۔ناسا سے منسلک سائنس دانوں نے اپنی ایک نئی تحقیق کے نتائج جاری کیے تھے جس کے مطابق سمندروں کی سطح میں 1992ءسے اوسطاً آٹھ سینٹی میٹرکا اضافہ ہورہا ہے۔تحقیق کے مطابق سمندروں کی سطح میں یہ اضافہ درجہ حرارت میں مسلسل اضافے اور گلیشئرز پگھلنے کا نتیجہ ہے۔سمندروں کی تحقیق سے متعلق ناسا کے شعبے سے منسلک پروفیسر اسٹیو نیرم کے مطابق اگر درجہ حرارت میں اضافے اور برفانی تودوں کے پگھلنے کا عمل جاری رہا تو رواں صدی کے اختتام تک دنیا میں سمندروں کی سطح میں کم از کم ایک میٹر تک اضافہ ہوچکا ہوگا۔ناسا کے سائنس دانوں کا کہنا ہے کہ یہ تحقیق دنیا خصوصاً براعظم ایشیا کے ملکوں کےلیے خطرے کی گھنٹی ہے جہاں لگ بھگ ڈیڑھ کروڑ افراد ایسی ساحلی بستیوں میں مقیم ہیں جو سطحِ سمندر سے ایک میٹر سے بھی کم بلند ہیں۔چارلس بولڈن نے کہا کہ اگر دنیا نئی تحقیق کے نتیجے میں سامنے آنے والی معلومات پر فوری توجہ دے تو مستقبل میں سامنے آنے والے خطرے کا تدارک کیا جاسکتا ہے۔