سوات ، ڈیرہ غازی خان (این این آئی)سوات کے پہاڑی علاقوں میں تیز بارش کے بعد ندی نالے بپھر گئے اور سیلابی ریلے کے اسکولوں میں داخل ہونے کے باعث بچے پھنسے رہے ریسکیو اہلکاروں نے بچوں کو بحفاظت نکال لیا ، گھر اور دکانیں پانی میں ڈوب گئیں۔دوسری جانب دیر بالا
اسکول کے بچے چھٹی کے بعد گھر جاتے ہوئے سیلابی ریلے میں بہہ گئے، پانچ میں سے تین بچوں کی لاشیں مل گئیں۔رپورٹس کے مطابق خیبرپختونخوا میں مون سون کی حالیہ بارشوں اور سیلابی ریلوں سے 14 ہزار ایکڑ سے زیادہ رقبے پر کھڑی فصلیں اور سبزیاں پانی کی نذر ہوگئیں۔خیبرپختونخوا حکومت نے ڈیرہ اسماعیل خان، اپر کوہستان، چترال اور ٹانک کے اضلاع کو آفت زدہ قرار دیدیا ہے۔دوسری جانب ڈیرہ غازی خان میں بارش اور سیلاب سے کچے مکانات تباہ ہوگئے۔ڈیرہ غازی خان میں گزشتہ رات سے شہر اورکوہ سلیمان میں بارش کا سلسلہ نہ رک سکا جہاں وڈوربرساتی ندی میں اونچے درجے کا سیلابی ریلا گزررہا ہے ،مزید بارش سے برساتی ندیوں میں پانی کی سطح میں مسلسل اضافہ ہونے لگا ،ڈی جی خان کے سخی سرور روڈ پر حفاظتی بند ٹوٹنے سے کوئٹہ روڈ پر قریبی بستیاں زیر آب آگئیں۔پولیٹیکل اسسٹنٹ کیمطابق قبائلی علاقوں میں نویں روزبھی زمینی راستے منقطع ہوگئے اور قبائلی علاقوں میں 90 فیصد کچے گھروں کو نقصان پہنچا جہاں ریلیف کا کام جاری رہا۔ڈی جی خان میں گرڈو کے مقام پر لینڈ سلائیڈنگ سے پنجاب بلوچستان شاہراہ جمعرات کو بھی بند رہی۔
