اسلام آباد (این این آئی)چیئرمین قائمہ کمیٹی برائے اطلاعات اور مسلم لیگ (ن )کے سینئر رہنماء میاں جاوید لطیف نے کہا ہے کہ عمران خان پہلا سابق وزیر اعظم ہے جو پاکستان کے ایٹمی پروگرام کو غیر محفوظ قرار دے رہا ہے۔
عمران خان کے یہ بیانات پاکستان کے خلاف بین الاقوامی فورمز پر ایف آئی آر کے مترادف ہیں۔ اپنے بیان میں انہوں نے کہاکہ عمران خان کا پاکستان کے ایٹمی پروگرام کے خلاف پروپیگنڈہ عالمی سازش کی کڑیاں ہیں۔انہوںنے کہاکہ عمران خان بیرونی آقاؤں کی خوشنودی کے لیے پاکستان مخالف بیان دے رہا ہے۔انہوں نے کہاکہ اقتدار جانے کے غم میں عمران خان باؤلا ہو چکا ہے،پاکستان کی ریاست کے خلاف بیان بازی پر عمران خان کو شرم آنی چاہیے۔ انہوں نے کہاکہ کیا اقتدار اتنی بڑی چیز ہے کہ جس کے جانے پر مادر وطن پر حملہ کر دیا جائے،کرسی جانے کے غم میں عمران خان ایسے بیانات دے کر بھارت اور اسرائیل کو خوش کر رہا ہے۔انہوں نے کہاکہ عمران خان اس بیان پر قوم سے معافی مانگے ورنہ اسکے خلاف سخت ترین کاروائی عمل میں لائی جائے۔انہوں نے کہاکہ ایٹمی پروگرام کے خالق اور ایٹمی دھماکے کرنے والے اسکے خلاف کوئی سازش کامیاب نہیں ہونے دیں گے۔
