اسلام آباد (این این آئی)پاکستان پیپلز پارٹی کے چیئرمین بلاول بھٹو زرداری نے کہا ہے کہ اپوزیشن نے عمران خان کو اقتدار سے ہٹانے کا فیصلہ عمران خان کے دورہ روس سے بہت پہلے کر لیا تھا۔امریکی نشریاتی ادارے سی این این کو انٹرویو دیتے ہوئے بلاول بھٹو نے کہا کہ

پاکستان کو حال ہی میں وہی تجربہ ہوا جو امریکی عوام کو 6 جنوری کے ٹرمپ کے واقعہ میں ہوا تھا۔انہوںنے کہاکہ عمران خان نے آئینی بغاوت کی کوشش کی ، عمران خان کے ٹرمپ سے بھی اچھے تعلقات تھے۔ بلاول بھٹو زر داری نے کہا کہ آزادانہ اور منصفانہ انتخابات چاہتے ہیں لیکن اْس کے لیے انتخابی اصلاحات لازمی ہیں،اس کے علاوہ بلاول بھٹو زرداری نے کہا کہ میرا وزیر خارجہ بننا ان کی جماعت کیلئے مشکل ہوگا کیونکہ پیپلز پارٹی حکومتی اتحاد کی دوسری بڑی جماعت ہے۔بلاول بھٹو زر داری نے کہاکہ عمران خان پاکستانی عوام کے عمومی امریکا مخالف جذبات کا فائدہ اْٹھاتے ہوئے ملک کے 70 فیصد سیاسی نمائندوں کو غدار قرار دے کر خطرناک کھیل کھیل رہے ہیں۔بلاول بھٹو زر داری نے کہا کہ امریکا چاہے کتنا ہی موروثی سیاست اور اقربا پروری پر تنقید کیوں نہ کرے، حقیقت یہ ہے کہ آخر میں اہمیت اسی بات کی ہے کہ پاکستانی عوام کسے منتخب کرتے ہیں۔