لاہور(این این آئی) پنجاب اسمبلی میں قائد حزب اختلاف حمزہ شہباز نے کہاہے کہ اپوزیشن نے جتنی پیشیاں بھگتنی تھیں بھگت لیں، عمران نیازی کی پیشی اب عوام کی عدالت

میں ہوگی۔احتساب عدالت میں رمضان شوگر ملز کیس کی سماعت کے بعد میڈیا سے گفتگو کرتے ہوئے حمزہ شہباز نے کہا کہ میں اور میرے والد 150 پیشیاں بھگت چکے ہیں، ان کا اصل چہرہ اللہ نے بے نقاب کیا ہے۔حمزہ شہباز نے کہا کہ مسلم لیگ (ن)کے دورِ حکومت میں کرپشن کا انڈیکس 127 سے 117 ہوا، ہماری حکومت میں موٹرویز بنیں اور بجلی کے اربوں کے منصوبے لگے۔پاکستان میں کسان آج کھاد کی بوری کے لیے لائنوں میں لگ رہے ہیں، یہ حقیقت ہے عمران نیازی کے افسانے نہیں ہیں، کرپشن کے خاتمے کا ایجنڈا لے کر آنے والی جماعت کے دور میں کرپشن بڑھی، عمران نیازی ڈھٹائی سے کہتا ہے ٹرانسپرنسی انٹرنشنل رپورٹ نہیں مانتا۔انہوںنے کہاکہ اپوزیشن نے جتنی پیشیاں بھگتنی تھیں بھگت لیں، اب عمران نیازی کی پیشی عوام کی عدالت میں ہوگی۔