کراچی(این این آئی) ویسٹ انڈیز کرکٹ ٹیم دورہ پاکستان پر کراچی پہنچ گئی۔جمعرات کو مہمان ٹیم دبئی کے راستے کراچی پہنچی،اس موقع پر سیکوریٹی کے سخت ترین انتظامات کیے گئے،مقامی ہوٹل آمد پر کوویڈ19 ٹیسٹ کے بعدکھلاڑی اور آفیشلز ایک دن کیلئے قرنطینہ کریں گے۔

جمعہ کو نیشنل اسٹیڈیم میں پہلا پریکٹس سیشن ہوگا۔ سیریز 13 تا 22 دسمبر نیشنل اسٹیڈیم میں کھیلی جائے گی۔ تین ٹی ٹوئنٹی میچز اور اتنے ہی آئی سی سی مینز کرکٹ ورلڈ کپ سپر لیگ میچز ہوں گے،ٹی ٹوئنٹی سیریز میں ویسٹ انڈیز کی قیادت نکولس پوران کریں گے جبکہ ون ڈے میچز میں شائی ہوپ کپتان کی ذمہ داری ادا کریں گے۔کیرون پولارڈ انجری کے سبب سیریز سے دستبردار ہوگئے تھے۔ ٹی ٹوئنٹی میں ان کی جگہ رومان پاول اور ون ڈے میں ڈیورنڈ تھامس کو شامل کیا گیا ہے۔ پاکستان اور ویسٹ انڈیز کے درمیان پہلا ٹی ٹوئنٹی 13دسمبر کو کھیلا جائیگا ۔ شیڈول کے مطابق دونوں ٹیموں کے درمیان 13 دسمبر کو پہلا ٹی ٹوئنٹی میچ شام 6 بجے شروع ہوگا، 14 دسمبر کو دوسرا ٹی ٹوئنٹی میچ کھیلا جائیگا، 16 دسمبر کو تیسرے اور آخری ٹی ٹوئنٹی میچ کا آغازشام 6 بجے ہوگا، 18 دسمبر کو پہلا ون ڈے انٹر نیشنل میچ کھیلا جائے گا۔ دوسرا ون ڈے 20 دسمبر کو ہوگا جبکہ22 دسمبر کو تیسرا اور آخری ون ڈے میچ کھیلا جائے گا۔