اسلام آباد ( آن لائن) پٹرولیم مافیا ،آئل مارکیٹنگ کمپنیز، اوگرا ، منسٹری آف انرجی و پٹرولیم ڈویڑن اور دیگر شعبہ ہائے جات کے خلاف ایف آئی اے نے گھیرا تنگ کردیا۔ میڈیا رپورٹ کے مطابق ایف آئی اے نے وفاقی حکومت کے احکامات پرجون 2020 میں پیٹرولیم بحران

پر ہونے والی انکوائریزکے بعد فوسل انرجی اور عاسکر آئل (پیٹرولیم مارکیٹنگ کمپنیز) پر مقدمات درج کیے تھے۔ایف آئی اے لاہورنے سی ای او فوسل انرجی ندیم بٹ ،اوگرا کے ممبر گیس عامر نسیم ، ممبر آئل عبداللہ ملک، منسٹری آف انرجی و پٹرولیم کے ڈی جی آئل شفیع اللہ آفریدی اور اسسٹنٹ ڈائریکٹر آئل عمران ابڑو کو گرفتار کرلیا ہے۔ رپورٹ کے مطابق اوگرا کے افسران نے غیر قانونی پیٹرولیم مارکیٹنگ لائسنس جاری کئے جبکہ منسٹری آف انرجی و پٹرولیم ڈویژن کے افسران نے ناجائز پیٹرولیم امپورٹ کوٹہ جاری کیا۔بتایا گیا ہے کہ پیٹرولیم مارکیٹنگ کمپنیز نے اوگرا کی آشیرباد سے ملک بھر میں منظور شدہ تعداد سے زیادہ غیر قانونی پیٹرول پمپس کا جال بچھایا ہے۔ رپورٹ کے مطابق ملزمان کے خلاف باہمی ملی بھگت سے غیر قانونی پیٹرولیم مارکیٹنگ لائسنس، ناجائز پیٹرولیم امپورٹ کوٹہ اور غیر قانونی پیٹرولیم امپورٹس کی خریدوفروخت سے قومی خزانے کو اربوں روپے کا نقصان پہنچانے اور اس سے کمائے جانے والے اربوں روپے کے ناجائز دھن کی منی لانڈرنگ کا الزام ہے۔