اسلام آباد (آن لائن) الیکشن کمیشن آف پاکستان نے ملکی ووٹرز لسٹوں میں بڑے پیمانے پر بے ضابطگیوں کا نوٹس لے لیا ہے ۔ تمام ووٹر لسٹوں کو درست کرنے کیلئے ڈور ٹو ڈور تصدیقی مہم شروع کرنے کا فیصلہ کیا ہے ۔ تصدیقی مہم مارچ 2022 تک جاری رہے گی ۔ ذرائع کے مطابق

ووٹر لسٹوں میں بے ضابطگیوں پر قائم کی گئی کمیٹی نے اپنی سفارشات الیکشن کمیشن کو دیدیں، ووٹر لسٹوں میں بے ضابطگیوں پر ڈائریکٹر ایم آئی ایس کو معطل کر کے باضابطہ انکوائری بھی شروع کردی ہے ،ذرائع نے بتایا کہ الیکشن کمیشن کمیٹی کی سفارش پر پوری ووٹرز فہرستوں کو دوبارہ مرتب کر رہا ہے ۔ پہلے مرحلے میں تمام صوبائی الیکشن کمشنرز سے ڈیٹا کلیکٹرز ڈسپلے سنٹرز کی تعداد مانگی لی گئی ہے ۔ دوسرے مرحلے میں تصدیقی مہم کیلئے سٹاف کی تربیت کی جائے گی۔ تیسرے مرحلے میں ڈور ٹو ڈور تصدیقی مہم ہوگی۔ مہم میں 11 کروڑ سے زائد ووٹرز کا ان کی مرضی سے اندراج ہوگا ۔ ڈیٹا فیڈنگ کے بعد ڈسپلے سنٹرز پر ابتدائی فہرستیں رکھی جائیں گی۔ ووٹرز کو درستگی، اندراج اور اعتراضات کا وقت دیاجائے گا۔ آخری مرحلے میں اعتراضات پر فیصلے کرکے حتمی ووٹرز لسٹیں جاری کی جائیں گی۔ عام انتخابات 2023 کیلئے نئی مرتب شدہ ووٹرز لسٹیں استعمال ہونگی۔ تصدیقی مہم مکمل ہونے تک موجودہ ووٹرز لسٹیں برقرار رہیں گی۔