ماسکو،واشنگٹن (مانیٹرنگ ڈیسک ، این این آئی)روس نے 3امریکی سفارت کاروں پر چوری کا الزام عائد کرتے ہوئے ان کے سفارتی استثنیٰ کو ختم کرنے کا مطالبہ کردیا،عالمی میڈیا رپورٹس کے مطابق روس نے تین امریکی سفارتکاروں پر چوری کا الزام لگایا ہے۔روس کے مطابق

تینوں امریکی سفارتکاروں پر روسی شہری سے چیزیں چرانے کا الزام ہے۔روس نے امریکی حکومت سے مطالبہ کیا ہے کہ تینوں سفارت کاروں کا استثنیٰ ختم کیا جائے اگر سفارتی استثنیٰ ختم نہ کیاگیا توفوری ملک چھوڑناہوگا۔دوسری جانب امریکی سینیٹرز نے بھی ویزا تنازعے پر 300 روسی سفارت کاروں کو نکالنے کا مطالبہ کر دیا۔میڈیارپورٹس کے مطابق ماسکو نے سفارت خانوں کو روسی یا تیسرے ملک کے عملے کی خدمات حاصل کرنے سے روک دیا تھا۔اس پابندی کے باعث امریکا کو روس بھر میں اپنے مشنز سے 200 کے قریب مقامی افراد کو ہٹانا پڑا تھا۔اس وقت روس میں امریکا کے 100 اور امریکا میں روس کے 400 سفارت کار تعینات ہیں۔امریکی سینیٹرز کی جانب سے صدر جو بائیڈن کو خط لکھا گیا جس میں کہا گیا کہ سفارت کاروں کی غیر متناسب نمائندگی ناقابلِ قبول ہے۔امریکی صدر کو 2 ری پبلکن اور 2 ڈیمو کریٹ سینیٹرز نے خط لکھا جن میں چیئرمین سینیٹ فارن ریلیشنز کمیٹی بوب میننڈیز اور ری پبلکن مارکو روبائیو شامل ہیں۔خط میں یہ بھی کہا گیا کہ روس امریکا کو اتنے ہی سفارتی ویزے جاری کرے جتنے امریکا نے کیئے، ایسا اقدام نہ کیا گیا تو روسی سفارت کاروں کو نکالنے پر غور کیا جائے۔