نئی دہلی (این این آئی )طالبان کے افغانستان پر کنٹرول کرنے کے ساتھ ہی اس کے اثرات دیگر ملکوں پر دکھائی دینے لگے ہیں۔ افغانستان سے بھارت کو ہونے والی درآمدات اور برآمدات فی الحال بند ہو گئی ہیں۔میڈیارپورٹس کے مطابق فیڈریشن آف انڈین ایکسپورٹ آرگنائزیشن (ایف آئی ای او)کےڈائریکٹر جنرل اجے ساہی نے میڈیا کو بتایا کہ طالبان نے پاکستان کے ٹرانزٹ روٹ کے ذریعہ بھارت آنے والے کارگو کی آمدورفت روک دی ہے۔ اس طرح بھارت کو درآمدات پوری طرح بند ہو گئی ہیں۔اجے ساہی کا کہنا تھاکہ افغانستان میں ہونے والی پیش رفت پر ہماری قریبی نگاہ ہے۔وہاں سے بھارت کو درآمد ہونے والی اشیا پاکستان کے راستے ہو کر آتی ہیں۔ چونکہ فی الوقت طالبان نے پاکستان جانے والے کارگو پر روک لگادی ہے اس لیے بھارت کو ہونے والی درآمدات بھی بند ہو گئی ہیں۔ایف آئی ای او کے ڈائریکٹر جنرل نے کہاکہ درحقیقت بھارت افغانستان کے سب سے بڑے پارٹنرز میں سے ایک ہے۔ سن 2021 میں افغانستان کے ساتھ اندازا ہماری برآمدات 835 ملین ڈالر اور درآمدات کا 510 ملین ڈالر کے قریب رہنے کا امکان ہے۔بھارت نے افغانستان میں تجارت کے علاوہ بھی دیگر شعبوں میں کافی سرمایہ کاری کر رکھی ہے۔ بھارت نے افغانستان میں تقریبا 400 منصوبوں پر لگ بھگ تین ارب ڈالر کی سرمایہ کاری کی ہے۔