ماسکو (این این آئی )روس کے فار ایسٹرن جزیرہ نما کمچٹکا میں ایک مسافر طیارے کا ایئر ٹریفک کنٹرول سے رابطہ منقطع ہو گیا ہے۔ طیارے میں دو درجن سے زائد افراد سوار ہیں۔میڈیارپورٹس کے مطابق مقامی ٹرانسپورٹ پراسیکیوٹر آفس کی ترجمان ویلینٹیا گلیزووا نے

خبر رساں ایجنسی بتایا کہ اے این 26 طیارہ کمچٹکا کے مرکزی شہر پیٹروپولوسک کامچسکی سے پالانا جا رہا تھا جب وہ غائب ہو گیا اور شیڈول کے مطابق لینڈنگ نہ کر سکا۔انہوں نے بتایا کہ جہاز میں 29 افراد سوار ہیں جن میں سے 23 مسافر اور چھ عملے کے ارکان ہیں۔ انہوں نے بتایا کہ مسافر طیارے کی تلاش اور امدادی کوششیں جاری ہیں، اس وقت اتنا معلوم ہے کہ طیارے سے رابطہ منقطع ہو گیا تھا اور اس نے لینڈ نہیں کیا۔روسی ذرائع ابلاغ نے مقامی عہدیداران کا حوالہ دیتے ہوئے کہا تھا کہ طیارے میں 28 افراد سوار ہیں جن میں چھ عملے کے ارکان اور ایک یا دو بچے شامل ہیں۔مسافر طیارے کے ساتھ کیا ہوا ہوگا اس حوالے سے متضاد رپورٹس سامنے آ رہی ہیں، روس کی خبر ایجنسی نے ذرائع کا حوالہ دیتے ہوئے لکھا کہ طیارہ سمندر میں گر کر تباہ ہوا ہے جبکہ ایک دوسرے ذرائع نے انٹرفیکس کو بتایا ہے کہ طیارہ پالانا کے قصبے کے قریب کوئلے کی کان کے نزدیک چلا گیا ہے۔رپورٹس کے مطابق مسافر طیارے کی تلاش کے لیے کم از کم دو ہیلی کاپٹرز کو لانچ کیا گیا ہے جبکہ امدادی کارکنوں کو بھی تیار رہنے کا کہا گیا ہے۔روس جو ایک زمانے میں طیاروں کے حادثات کے لیے بدنام رہا ہے، نے اپنے فضائی ٹریفک کے حفاظتی ریکارڈ کو حالیہ سالوں میں بہتر کیا ہے تاہم طیاروں کی خراب حالت اور حفاظت کے معیار میں لاپرواہی کا مسئلہ تاحال اپنی جگہ ہے اور حالیہ سالوں میں روس کو کئی جان لیوا فضائی حادثات کا سامنا رہا ہے۔آخری بار بڑا فضائی حادثہ مئی 2019 میں پیش آیا تھا جب سخوئی سپر جیٹ نے ماسکو ایئرپورٹ پر کریش لینڈنگ کے بعد آگ پکڑ لی تھی، اس حادثے میں 41 افراد ہلاک ہوئے تھے۔