لاہور (آن لائن)امیرجماعت اسلامی صوبہ پنجاب وسطی محمد جاوید قصوری نے کہا ہے کہ حکومت نے رواں مالی سال کے11 ماہ کے دوران 12ارب 13کروڑ پچاس لاکھ ڈالر کے غیر ملکی قر ضہ حاصل کیا ہے۔ ملکی و غیر ملکی قرض میں دن بدن اضافہ ہوتا چلا جارہا ہے مگر عوام کو ریلیف کہیں نظر نہیں آتا ہے۔ گردشی قرضہ تاریخ
کی بلند ترین سطح پر پہنچ چکا ہے۔ عوام سوال پوچھتے ہیں کہ کیا یہ ہے وہ تبدیلی جس کا خواب قوم کو دکھایا گیا تھا ؟ ۔ان خیالات کا اظہار انہوں نے منصورہ میں مختلف عوامی وفود سے گفتگو کرتے ہوئے کیا ۔ انہوں نے کہا کہ 27میں سے 26اہداف مکمل کرنے کے باوجود پاکستان کو فٹیف کی گرے لسٹ میں رکھنا تعصبانہ طرز عمل ہے۔ جس کی جتنی بھی مذمت کی جائے کم ہے۔ دنیا کو منافقانہ رویہ ترک کرتے ہوئے پاکستانیوں کی قربانیوں کا اعتراف کرنا ہوگا۔انہوں نے کہا کہ نائن الیون کے بعد سے اب تک 75ہزار سے زائد پاکستانی نام نہاد امریکی جنگ میں لقمہ اجل بن چکے ہیں۔ ملکی معیشت کے ڈیڑ ھ سو ارب ڈالر کا نقصان ہوا ہے۔ امریکہ کے ڈو مور مطالبے پر پاکستان کی ماضی کی حکومتوں نے غیر ملکی آقائوں کو خوش کرنے کے لیے سب کچھ دائو پر لگایا ۔ مگر اس کے باوجود امریکہ آج بھی نا خوش ہے۔ محمدجاوید قصوری نے اس حوالے سے مزید کہا کہ جماعت اسلامی اول دن سے ہی مطالبہ کرتی چلی آرہی ہے کہ حکومت پاکستان کی جانب سے امریکی ڈو مور کے مطالبے پر، جرأتمندانہ موقف اختیار کیا جائے ۔ پاکستانی قوم امریکی کی بے وفائیوں سے بخوبی واقف ہے۔ آج اور نہ ہی مستقبل میں ،اس پر اعتماد نہیں کیا جاسکتا ۔ پاکستان کو چین ، ترکی ،ایران اور ملائیشیا کے ساتھ مل کر ایک نئے اتحاد کی بنانے کی ضرورت ہے۔
