لاہور(این این آئی)پاکستان مسلم لیگ (ن)کی نائب صدر مریم نواز سے مرکزی جمعیت اہلحدیث کے سربراہ پروفیسر ساجد میر کی سربراہی میں وفدنے جاتی امراء رائے ونڈ میں ملاقات کی۔ ملاقات میں ناظم اعلی حافظ عبدالکریم، علامہ ابتسام الٰہی ظہیر، ڈاکٹر عبدالغفور، مولانا عبد الرشید حجازی اور کاشف نواز رندھاوا سمیت دیگر بھی شریک ہوئے۔پروفیسر ساجد میر نے مریم نواز سے نیب پیشی کے موقع پر پیش آنے والے
نا خوشگوار واقعہ کی شدید مذمت کی۔ ساجد میر نے مریم نوازسے ان کے والد محمد نواز شریف کی صحت سے متعلق بھی آگاہی حاصل کی اور ان کی جلد صحتیابی کی دعا کرتے ہوئے نیک خواہشات کا اظہار کیا۔ اس موقع پر ملک کی مجموعی سیاسی صورتحال پر بھی تبادلہ خیال کیا گیا۔بعدازاں میڈیا سے گفتگوکرتے پروفیسر ساجدمیر نے کہا کہ مریم نواز سے ملاقات کامقصد ان سے اظہارہمد ردی کرنا تھا۔مریم نواز کی گاڑی دیکھی ہے فرنٹ سکرین پر نشانات پتھر کے نہیں ہیں،مریم نواز کی گاڑی پر سنائپر کی دو گولیوں کے نشانات ہیں،مریم نواز پر دھاوے کی مذمت کرتے ہیں،جس نے بھی کیا اس کا قوم کو نقصان ہو سکتا تھا۔ انہوں نے کہا کہ ان کے شوہر کیپٹن (ر)صفدر نے اس کے مقدمہ کی درخواست دی لیکن مقدمہ درج نہ ہوا، جان لینے کی کوشش کی گئی،مریم نواز پر دھاوا سیاسی تقسیم کیلئے کیاگیا،اسلحہ کا پتہ نہیں کس کاتھا لیکن دھاوا سنائپر کا ہی ہے،مریم نواز پر حکومت نے دھاوا بلوایا،مریم نواز جب بولتی ہیں تو حکومت کو تکلیف ہوتی ہے،حکومت اپنے راستے سے کانٹے ہٹانا چاہتی ہے۔انہوں نے کہاکہ مریم نواز پردھاوا قابل مذمت ہے،اس گھناؤنے جرم کو نظر انداز نہیں کیا جا سکتا، غیر جانبدارانہ تحقیقات سے اصل کرداروں کو بے نقاب کرنا ضروری ہے۔ انہوں نے کہا کہ جمہوری جدوجہد میں ہمیشہ مسلم لیگ (ن) کے ساتھ رہیں گے، پاکستان کو فسطائیت میں تبدیل کرنے کے خلاف جمہوری قافلے میں شامل ہیں اور عمران خان کوبتاناچاہتے ہیں کہ وہ مریم نوازکو تنہا نہ سمجھیں، کل بھی ان کے ساتھ تھے، آج بھی ان کے ساتھ ہیں اور کل بھی ان کے ساتھ رہیں گے۔ انہوں نے کہا کہ مریم نواز سے ان کے والد محمد نوز شریف کی صحت بارے بھی آگاہی حاصل کی،نوازشریف کی ایک دل کی شریان نوے فیصد بند ہے،کرونا وائرس کی وباء کی وجہ سے نوازشریف کی سرجری نہیں ہو رہی۔
