سرینگر (این این آئی) مقبوضہ جموں و کشمیر 14 سی آر پی ایف اہلکاروں کا کورونا وائرس ٹیسٹ مثبت پایا گیا جس کے بعد رواں مہینے میں کورونا وائرس سے متاثر سی آر پی ایف اہلکاروں کی تعداد 76 ہو گئی ہے ،ایک اہلکار کی موت بھی ہوئی ہے۔
میڈیا رپورٹ کے مطابق شیر کشمیر انسٹی ٹیوٹ آف میڈیکل سائنس صورہ کے میڈیکل سپرنٹنڈنٹ ڈاکٹر فاروق جان نے بتایا کہ وادی کشمیر میں تعینات 14 سی آر پی ایف اہلکاروں کا کورونا ٹیسٹ پازیٹو آیا ہے۔ گزشتہ روز جانچ کے لیے ان کے سیمپلز لیے گئے تھے۔ان کا کہنا تھا کہ جانچ کی رپورٹ مثبت آنے کے بعد انتظامیہ نے ان اہلکاروں کے رابطے میں آنے والے دیگر جوانوں کو بھی قرنطینہ میں رکھا گیا۔انہوں نے بتایا کہ متاثرہ اہلکاروں سے متعلق کوئی سفری تفصیلات دستیاب نہیں ہے۔یاد رہے کہ اس سے قبل رواں مہینے کی چودہ تاریخ کو دس اہلکاروں کا کورونا ٹیسٹ پازیٹو آیا تھا جبکہ دس تاریخ کو 28 اہلکار اور چھ تاریخ کو 24 اہلکاروں کی کورونا رپورٹ مثبت آئی تھی۔ اس کے علاوہ رواں مہینے کی آٹھ تاریخ کو ایک چالیس سالہ سی آر پی ایف اہلکار کی موت بھی واقع ہوچکی ہے۔ اس کی آخری رسومات کشمیر میں ہی ادا کی گئی تھیں۔
