بنکاک(این این آئی)تھائی لینڈ میں کورونا وائرس سے پہلی ہلاکت سامنے آگئی جبکہ امریکا اور آسٹریلیا میں بھی کورونا وائرس سے پہلی ہلاکت کی تصدیق ہوئی ہے۔غیر ملکی خبر ایجنسی کے مطابق تھائی وزارتِ صحت نے تصدیق کی کہ کورونا وائرس میں مبتلا 35 سالہ تھالی لینڈ کے شہری کی موت واقع ہوگئی ہے۔تھائی وزارت صحت کا یہ بھی کہنا تھا کہ تھائی لینڈ میں اب تک کورونا وائرس کے 42 کیسز کی تصدیق ہو چکی ہے۔

ادھر چین میں کورونا وائرس سے مزید 35 نئی ہلاکتوں کے بعد اس وائرس سے مرنے والوں کی تعداد 2 ہزار 870 ہو گئی۔ووہان شہر میں نومولود کورونا وائرس میں مبتلا ہو گیا، اس سے قبل بچے کی ماں کورونا وائرس کا شکار ہو گئی تھی۔نیشنل ہیلتھ کمیشن کے مطابق چین میں کورونا وائرس کے مزید 573 نئے کیسز سامنے آنے کے بعد مجموعی تعداد 79 ہزار 824 ہوگئی ہے۔چین میں وائرس سے متاثرہ متعدد افراد صحت یاب ہو کر گھروں کو لوٹ رہے ہیں اور اب صحت یاب ہونے والے افراد کی تعداد مریضوں کے مقابلے میں زیادہ ہو گئی ہے۔اس وقت چین کے اسپتالوں میں 35 ہزار 329 مریضوں کا علاج جاری ہے جبکہ صحت یابی کے بعد اسپتال سے ڈسچارج ہونے والوں کی تعداد 41 ہزار 625 ہو گئی ہے۔چین کے علاوہ دنیا کے بیشتر ملک ایک کے بعد ایک کورونا وائرس کا شکار ہونے لگے ہیں، گزشتہ 9 دنوں میں 33 ملکوں میں کورونا وائرس کے پہلے پہلے کیس کی تصدیق ہوئی ہے۔چین سمیت دنیا بھر میں وائرس سے ہونے والی اموات کی تعداد 2 ہزار 976 ہوگئی ہے جبکہ چین کے علاوہ دیگر ملکوں میں اموات کی تعداد 106 ہے۔چین کے علاوہ دنیا کے دیگر ملکوں میں اس وقت کورونا وائرس کے 6 ہزار 676 کیسز کی تصدیق ہوئی ہے، جس کے بعد چین سمیت دنیا بھر میں کیسز کی مجموعی تعداد 86 ہزار 500 ہوگئی ہے۔امریکا اور آسٹریلیا میں کورونا وائرس سے پہلی ہلاکت کی تصدیق کی گئی ہے۔ایکواڈور میں کورونا وائرس کا پہلا کیس سامنے آگیا، فرانس میں عوامی اجتماعات پر پابندی لگا دی گئی۔آسٹریلیا نے ایران سے آنے والے غیر ملکیوں پر ملک میں داخلے پر پابندی لگانے کا اعلان کر دیا۔