واشنگٹن(این این آئی) امریکی کانگرس میں ڈیموکریٹک پارٹی کے 107 ارکان نے صدر ڈونلڈ ٹرمپ کو ان کے مشرق وسطی سے متعلق نام نہاد امن منصوبے پر وارننگ دی ہے۔ ان ارکان کا کہنا ہے کہ امریکی صدر کا مشرق وسطی کے لیے امن منصوبہ انتہائی متنازع ہے
اور اس کے نتیجے میں خطے میں امن کا قیام ممکن نہیں ہے۔میڈیارپورٹس کے مطابق ارکان کانگرس کی طرف سے امریکی صدر کو کہا گیا کہ ان کا مشرق وسطی کے لیے امن منصوبہ مقبوضہ فلسطینی علاقوں میں مزید بدامنی اور تشدد کا باعث بنے گا۔ اس کے ساتھ ساتھ یہ معاہدہ اسرائیل کے اردن اور مصر کے ساتھ طے پائے امن معاہدوں کو بھی خطرے میں ڈال دے گا۔کانگرس میں ڈیموکریٹک پارٹی کے107ارکان نے امریکی صدر ڈونلڈ ٹرمپ کو مکتوب ارسال کیا جس پرانہوں نے دستخط ثبت کیے ہیں۔انہوں نے امریکی صدر کو خبردار کیا کہ ان کا مشرق وسطی امن منصوبہ سنچری ڈیل تنازع کے حل کے بجائے مزید بدامنی کا باعث بنے گا۔انہوں نے خبردار کیا کہ یک طرفہ اقدامات سے تنازع فلسطین کے حل کے بجائے تنازع میں مزید شدت آسکتی ہے۔ اسرائیل کو غرب اردن اور وادی اردن کے علاقوں کو یک طرفہ طور پر اسرائیل میں ضم کرنے کے اقدامات سے سختی سے گریز کرنا ہوگا۔
