ماسکو(نیوزڈیسک ) روسی صدر ولادیمر پوٹن نے کہا ہے کہ روس اپنے دفاع کو ناقابل تسخیر بنانے کے لیے اپنی جوہری طاقت میں اضافہ کر رہا ہے جس کے تحت رواں سال 40 بین البراعظمی بلیسٹک میزائل جنگی بیڑے میں شامل کیے جائیں گے۔ماسکو میں ہونے والی اسلحہ کی نمائش کی تقریب سے خطاب میں روسی صدر کا کہنا تھا کہ نئے بیلیسٹک میزائل انتہائی جدید ہوں گے جو کسی بھی انتہائی جدید ٹیکنیکل میزائل شکن سسٹم کو بھی تباہ کرسکیں گے۔ ان کا کہنا تھا کہ یورپ میں امریکی اثرورسوخ تشویش ناک ہے اس لیے ضروری ہے کہ روس بھی اپنے دفاع کو مضبوط بنائے۔دوسری طرف روسی دفاع حکام نے خبردار کیا ہے کہ اگر امریکا نے مشرقی یورپ میں اپنے بھاری اسلحہ کی تنصیب کا منصوبہ عمل میں لایا تو روس اس کا بھر پور جواب دے گا۔واضح رہے کہ یورپی ممالک کی جانب سے یوکرین میں روسی مداخلت کے الزامات کے بعد نیٹو اور روس کے درمیان اختلافات بڑھ گئے ہیں جب کہ نیٹو یوکرین میں اپنی فوجی طاقت بڑھا رہا ہے۔