یرووان (نیوزڈیسک )یوئیفا کوالیفائرز کے سلسلے میں کھیلے گئے میچ میں سٹار فٹبالر کرسٹیانو رونالڈو کی شاندار ہیٹ ٹرک کی بدولت پرتگال نے آرمینیا کو 3-2 سے شکست دے دی۔ رونالڈو کی ہیٹ ٹرک کی خاص بات یہ تھی کہ یہ ان کے کیریئر میں پہلا موقع تھا جب وہ مسلسل تیسرے میچ میں بھی ہیٹ ٹرک کرنے میں کامیاب رہے۔ گویا رونالڈو نے لگاتار تیسرے میچ میں تین گول کرتے ہوئے ہیٹ ٹرکس کی ہیٹ ٹرک کر ڈالی ۔یوئیفا یورپین چیمپئن شپ کے لئے آرمینیا میں کھیلے گئے کوالیفائنگ میچ میں میزبان ٹیم کے مارکوس پزیلی نے میچ کے ابتدائی 15ویں منٹ میں ہی گول کرتے ہوئے اپنی ٹیم کو برتری دلائی۔ اس کے پندرہ منٹ بعد پرتگال کے کپتان نے پنالٹی کِک پر گول کرتے ہوئے سکور برابر کر دیا۔ دوسرے ہاف میں رونالڈو نے صرف تین منٹ میں دو گول کئے۔ انہوں نے پچیس گز کے فاصلے سے شاندار کِک کے ذریعے گول کرتے ہوئے ہیٹ ٹرک مکمل کی میچ ختم ہونے سے اٹھارہ منٹ قبل آرمینیا کے ہرائر نے گول کرتے ہوئے سکور کو دو تین تک پہنچایا اس فتح سے پرتگال نے گروپ آئی میں بارہ پوائنٹس کے ساتھ پہلی پوزیشن مضبوط کر لی ہے۔