اسلام آباد (نیوز ڈیسک) محرم الحرام کی آمد کے ساتھ ہی ملک بھر میں یومِ عاشور کے موقع پر دو روزہ سرکاری تعطیلات کی توقع ظاہر کی جا رہی ہے۔

تاہم تعطیلات کی حتمی تاریخوں کا اعلان مرکزی رویت ہلال کمیٹی کی جانب سے محرم کا چاند نظر آنے کے بعد کیا جائے گا۔فلکیاتی ماہرین کے ابتدائی اندازوں کے مطابق 9 اور 10 محرم الحرام رواں ماہ کے آخری ہفتے میں متوقع ہیں، جبکہ یومِ عاشور 25 اور 26 جون 2026 کو ہونے کا امکان ظاہر کیا جا رہا ہے۔حکومت کی جانب سے ہر سال 9 اور 10 محرم الحرام کو ملک بھر میں عام تعطیلات دی جاتی ہیں، تاہم ان تاریخوں کی باضابطہ توثیق چاند کی رویت کے بعد ہی ممکن ہوتی ہے۔ مرکزی رویت ہلال کمیٹی کے اعلان کے فوراً بعد وفاقی حکومت تعطیلات کے حوالے سے باقاعدہ نوٹیفکیشن جاری کرے گی۔

ان تعطیلات کے دوران سرکاری و نجی دفاتر، تعلیمی ادارے اور بینک بند رہتے ہیں تاکہ شہری یومِ عاشور کی مذہبی مناسبت سے اپنی سرگرمیوں میں شریک ہو سکیں۔دوسری جانب سپارکو کے ترجمان کا کہنا ہے کہ 15 جون کو محرم الحرام کا چاند نظر آنے کے امکانات بہت کم ہیں، جس کے باعث ذی الحج کے 30 دن مکمل ہونے کی توقع ہے۔ اس صورت میں یکم محرم 17 جون 2026 کو ہونے کا امکان ہے۔اگر یکم محرم 17 جون کو ہوتی ہے تو 10 محرم الحرام، یعنی یومِ عاشور، 26 جون بروز جمعہ کو منایا جائے گا۔