اسلام آباد (نیوز ڈ یسک) محکمہ موسمیات نے پیش گوئی کی ہے کہ بارش برسانے والا ایک نیا موسمی نظام پاکستان کے قریب پہنچ رہا ہے،
جس کے اثرات کے باعث پنجاب کے مختلف علاقوں میں موسم کا رخ تبدیل ہونے کا امکان ہے۔رپورٹس کے مطابق لاہور سمیت صوبے کے متعدد شہروں میں آئندہ چند روز کے دوران گرد آلود ہواؤں اور بارشوں کا امکان موجود ہے۔ ماہرین کا کہنا ہے کہ یہ سسٹم درجہ حرارت میں کمی اور موسم کو نسبتاً خوشگوار بنانے کا سبب بن سکتا ہے۔محکمہ موسمیات کے مطابق آج لاہور میں جزوی ابر آلود موسم رہنے کی توقع ہے جبکہ شام کے اوقات میں بادل چھانے کے امکانات بھی موجود ہیں۔ اسی طرح وسطی اور بالائی پنجاب کے مختلف علاقوں میں ہلکی بارش متوقع ہے۔موسمیاتی ماہرین کے مطابق لاہور میں کل بھی بارش ہونے کا امکان ہے، جس سے گرمی کی شدت میں کچھ کمی واقع ہو سکتی ہے۔ ان کا کہنا ہے کہ 20 جون تک سورج اور بادلوں کے درمیان وقفے وقفے سے تبدیلی کا سلسلہ جاری رہے گا،
جس کے نتیجے میں بعض مقامات پر دھوپ اور بعض علاقوں میں بارش دیکھنے کو مل سکتی ہے۔محکمہ موسمیات نے مزید بتایا ہے کہ 16 سے 18 جون کے دوران پنجاب کے مختلف اضلاع میں کہیں ہلکی جبکہ بعض علاقوں میں نسبتاً تیز بارش کا امکان موجود ہے۔لاہور میں آج کم سے کم درجہ حرارت 26 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 39 ڈگری سینٹی گریڈ تک پہنچنے کی توقع ظاہر کی گئی ہے۔
