اسلام آباد (نیوز ڈ یسک) پنجاب حکومت نے ڈرائیونگ لائسنس کے اجرا اور متعلقہ سہولیات کو مزید آسان بنانے کے لیے اہم اقدام اٹھاتے ہوئے
لائسنس سروسز کو شہریوں کی دہلیز تک پہنچانے کا فیصلہ کیا ہے۔ اب شہری مختلف لائسنس خدمات کے لیے آن لائن درخواست دے سکیں گے۔ اس مقصد کے تحت حکومت نے “دستک ایپ” کو ڈرائیونگ لائسنس انفارمیشن مینجمنٹ سسٹم کے ساتھ منسلک کر دیا ہے، جس سے لائسنس کے حصول کا عمل زیادہ تیز اور سہل ہو جائے گا۔ پنجاب ٹریفک پولیس کے مطابق اس اقدام کا مقصد عوام کو دفاتر کے غیر ضروری چکروں اور وقت کے ضیاع سے بچانا ہے۔
نئے نظام کے تحت شہری گھر بیٹھے لرنر ڈرائیونگ لائسنس کے لیے درخواست جمع کرا سکیں گے۔ اس کے علاوہ لائسنس کی تجدید، گمشدہ یا خراب شدہ لائسنس کے متبادل اجرا اور بین الاقوامی ڈرائیونگ لائسنس کے حصول کی درخواستیں بھی آن لائن دی جا سکیں گی۔
پنجاب ٹریفک پولیس کے مطابق لرنر لائسنس کی فیس فی کیٹیگری 500 روپے مقرر کی گئی ہے، جبکہ تجدید اور ڈوپلیکیٹ لائسنس کی فیس متعلقہ گاڑی یا موٹر سائیکل کی کیٹیگری کے مطابق نافذ قوانین کے تحت وصول کی جائے گی۔
شہری گوگل پلے اسٹور سے “دستک ایپ” ڈاؤن لوڈ کر کے موٹر سائیکل، کار، جیپ، ایل ٹی وی اور ایچ ٹی وی سمیت مختلف کیٹیگریز کی لائسنس خدمات سے فائدہ اٹھا سکتے ہیں۔
مزید معلومات یا رہنمائی کے لیے پنجاب ٹریفک پولیس نے شہریوں کو اپنی سرکاری ویب سائٹ سے رجوع کرنے کا مشورہ دیا ہے۔
