دوحہ(این این آئی) امریکی نمائندہ خصوصی برائے افغان مفاہمتی عمل زلمے خلیل زاد نے دعویٰ کیا ہے کہ امریکہ اور افغان طالبان کے درمیان ہونے والے مذاکرات معاہدے کے بہت نزدیک پہنچ گئے ہیں۔امید ہے کہ ہونے والے معاہدے سے نہ صرف افغانستان میں ہونے والے تشدد میں کمی آئے گی بلکہ بین الافغان مذاکرات کی راہ بھی ہموار ہوگی۔میڈیارپورٹس کے مطابق دوحہ میں جاری امن مذاکرات کے نویں دور کے اختتام پرسماجی رابطے کی ویب سائٹ ٹوئٹر پر جاری کردہ بیان میں افغان نڑاد
امریکی سفارتکار زلمے خلیل زاد نے کہا کہ امن معاہدے کا نواں دور مکمل ہوگیا ہے اور اب وہ اس سلسلے میں کابل حکومت سے مشاورت کریں گے۔زلمے خلیل زاد کے مطابق امن معاہدے کے بعد ایسا افغانستان دنیا کے سامنے آئے گا جو اپنی سرزمین کسی کو بھی دہشت گردی کے خلاف استعمال کرنے کی اجازت نہیں دے گا۔امریکہ اور افغان طالبان کے درمیان قیام امن کے لیے کیے جانے والے امن معاہدے کے حوالے سے باقاعدہ مذاکرات کا آغاز سال رواں کے آغاز میں ہوا تھا۔
