ڈھاکہ (نیوزڈیسک)بنگلہ دیش کے دورے پر گئے ہوئے بھارتی وزیرِ اعظم نریندر مودی نے انکشاف کیاہے کہ بنگلہ دیش کا قیام ہر بھارتی کی خواہش تھی۔خبر رساں ادارے پی ٹی آئی کے مطابق وزیر اعظم نریندر مودی نے کہا’جب بنگلہ دیش کے آزادی کی لڑائی لڑنے والے بنگلہ دیشی اپنا خون بہا رہے تھے، تو بھارتی بھی ان کے ساتھ کندھے سے کندھا ملا کر جدوجہد کر رہے تھے۔ اس طرح انھوں نے بنگلہ دیش کا خواب پورا کرنے میں مدد کی۔‘اس موقع پر وزیر اعظم شیخ حسینہ اور اعلیٰ افسران بھی موجود تھے ۔وزارت خارجہ کے ترجمان نے ٹوئٹر پر لکھا، ’وزیراعظم کا کہنا ہے کہ ہر بھارتی چاہتا تھا کہ آزاد بنگلہ دیش کا خواب حقیقت بنے۔‘وزیر اعظم مودی نے کہا کہ سنہ 1971 میں جب بنگلہ دیشی آزادی کے جنگجوو¿ں کی حمایت میں دہلی میں ستیہ گرہ تحریک چلی تھی تو ایک نوجوان رضاکار کے طور پر وہ بھی اس میں شامل ہونے آئے تھے۔