اسلام آباد (مانیٹرنگ ڈیسک) وقت بدلنے کے ساتھ ساتھ مختلف اشیا میں جدت آتی جارہی ہے جبکہ نئی نئی ایجادات بھی سامنے آرہی ہیں، ایسی ہی ایک ایجاد کار کی ٹچ اسکرین ونڈو بھی ہے جو خاص طور پر بچوں کے لیے تیار کی گئی ہے۔ معروف آٹو کمپنی ٹویوٹا کی جانب سے متعارف کروائی جانے والی اس گاڑی کا نام ’ونڈو ٹو دا ورلڈ‘ ہے۔ اس گاڑی کے شیشے ٹچ اسکرین پر مشتمل ہیں جن پر بچے ڈرائنگ کرسکتے ہیں۔ ان کھڑکیوں کو زوم کر کے
باہر کے مناظر کو مزید اچھی طرح دیکھا بھی جاسکتا ہے۔ بچوں کو سکھانے کی غرض سے اس میں ایک اور فیچر شامل کیا گیا ہے جس میں کھڑکی سے باہر نظر آنے والی اشیا پر ٹچ کرنے سے ان کا نام سامنے آجائے گا، جیسے گھر، سڑک یا درخت وغیرہ۔ اس فیچر کے تحت مختلف اشیا کا گاڑی سے فاصلہ بھی معلوم کیا جاسکتا ہے۔ اس گاڑی کا مقصد بچوں کے سیکھنے کے عمل کو تیز کرنا اور فونز سے ان کی توجہ ہٹا کر انہیں بیرونی دنیا اور ماحول کی طرف متوجہ کرنا ہے۔
