لاہور(نیوز ڈیسک)ہدایتکارسید نورنے کہاہے کہ ایران کاکلچرفلم کے ذریعے پوری دنیامیں مقبول ہوا،پاکستان میں وزارت ثقافت ہی نہیں یہاں ترقی کیاخا ک ہوگی۔ان خیالات کااظہارانہوں نے گزشتہ روز خانہ فرہنگ ایران میں پریس کانفرنس سے خطاب کرتے ہوئے کیا۔ سیدنور کاکہناتھاکہ میں حال ہی میں ایران میں ہونے والے بین الاقوامی فلمی میلے میں شرکت کرکے آیاہوں جہاں بہت سی محبتیں سمیٹیں۔ایرانی فلم میکرزنے پاکستانی فلم انڈسٹری کے ساتھ مکمل تعاون کی یقین دہانی کرائی ہے ،میں فلمی میلے میں اپنی فلم پرائس آف آنرکی نمائش کرناچاہتاتھالیکن وہ فلم ابھی مکمل نہیں ہو ئی۔آئندہ برس مذکورہ فلم کے علاوہ بچوں کے موضوع پر ایک فلم نورکی نمائش بھی وہاں کروں گاجس کی پوسٹ پروڈکشن ایران میں ہوگی۔
انکاکہناتھاکہ ایران کی فلمی صنعت بین الاقوامی سطح پرمقبول ہے۔وہاں کے فلمسازپاکستان کے ساتھ مشترکہ فلمسازی کے خواہشمندنہیں البتہ ہماری خواہش پر وہ تکنیکی سہولیات فراہم کرنے کیلئے تیارہیں۔سیدنورکاکہناتھاکہ میں بہت جلدلاہورمیں ایرانی فلم فیسٹیول کاانعقادکراﺅں گاجس میں شرکت کے لئے ایرانی فنکاروں ا ورفلم میکرزکوبھی مدعوکیاجائے گا۔اس موقع پر اسلامی جمہوریہ خانہ فرہنگ ایران کے ڈائریکٹرجنرل وکلچراتاشی اکبربرخورداری کاکہناتھاکہ ایرانی حکومت کے بارے میں کہاجاتاہے کہ وہ فلم کی مخالفت کرتی ہے حالانکہ ایسی کوئی بات نہیں ، ایرانی حکومت نے فلم کواہمیت دی کیونکہ وہ سمجھتی ہے کہ سینماتربیت کاحصہ اورثقافت کی بنیادہے۔