کراچی (نیوز ڈیسک )حدیقہ کیانی پہلی پاکستانی قوال سنگر بن گئیں ، آج کل وہ صوفیانہ کلام پر مبنی قوالیوں کا البم تیار کررہی ہیں۔ 2009 میں ان کا آخری وڈیو البم ریلیز ہوا تھا ، ایک طویل وقفہ کے بعد ان کی واپسی پاپ گلوکارہ کی حیثیت سے نہیں بلکہ قوال کے طور پر ہورہی ہے۔
اس حوالے سے گزشتہ روز گلوکارہ حدیقہ کیانی نے نمائندہ نجی ٹی وی سے ملاقات میں انکشاف کیا کہ میں نے قوالیاں گانے کا فیصلہ کر لیا ہے ، ماضی میں ہندوستان میں ثریا بھوپالی و دیگر خواتین گروپ کی قوالیاں مقبول رہی ہیں اب پاکستان میں خواتین قوال کلچر کو فروغ دینے کی ابتدا کردی ہے۔ قوالیوں کا البم ” وجد“ کے عنوان سے تیار کیا ہے جسے دو ماہ بعد بیرون ملک سے دنیا بھر میں ریلیز کیا جائے گا، البم بنانے میں میرے بھائی عرفان کیانی کا بڑا ہاتھ ہے۔ان کا کہنا تھا کہ گلوکاری چھوڑنے کی خبروں میں کوئی حقیقت نہیں ، ملک و بیرون ملک میوزک کنسرٹس میں کئی برس سے مصروف ہوں ، میرا بیٹا ناد علی 9 برس کا ہوگیا ہے اس کی تعلیم و تربیت پر خصوصی توجہ دے رہی ہوں اسی لئے تھوڑا کم ہی نظر آتی ہوں۔