اسلام آباد(مانیٹرنگ ڈیسک) حج کی سعادت حاصل کرنا ہر مسلمان مرد اور عورت کی دلی خواہش ہوتی ہے۔ حج ایک ایسا دینہ فریضہ ہے جو ارکان اسلام میں بھی شامل ہے تاہم یہ ہر مسلمان پر فرض نہیں۔ حج ان مسلمان مرد و خواتین پر فرض ہوتا ہے جو اس کی استطاعت مالی
و بدنی اعتبار سے رکھتے ہیں یعنی دولت مند اور صحت مند ہیں۔ ایسے خواتین و حضرات مسلمان جو حج کی سعادت حاصل نہیں کر سکتے ان کے لئے رحمت اللعالمین، سرورکائنات محمد مصطفیٰﷺ کے طفیل خدا کی رحمتوں کے خزانے حاصل کرنے کیلئے سہولت رکھ دی گئی ہے۔ آپ 9 ذوالحج کے مبارک دن کچھ خاص عبادات اور اذکار کے ذریعے بھی ڈھیروں ثواب کما سکتے ہیں۔م عرفات نہایت فضیلت والا دن ہے اور اس دن ذکر و عبادات کا خاص ثواب ہے۔ خصوصاً چھ خاص عبادات و اذکار کے ذریعے آپ اس رحمتوں کے خزانے سمیت سکتے ہیں۔ اس دن روزہ رکھنا بے پناہ اجر و ثواب کا باعث ہے لہٰذا ممکن ہو تو 9 ذوالحج کے دن روزہ رکھیں۔ صحیح مسلم کی ایک حدیث کا مفہوم ہے کہ جو شخص یوم عرفات کے دن روزہ رکھے گا اس کے پچھلے اور اگلے سال کے گناہ معاف کردئیے جائیں گے۔ اس دن ذکر و اذکار کرنا بھی نہایت فضیلت کا سبب ہے۔ اس دن کے حوالے سے چار خاص اذکار تسبیح یعنی سبحان اللہ ، تحمید یعنی الحمد اللہ، تکبیر یعنی اللہ اکبر اور تحلیل یعنی لا الہ الا اللہ ہیں، جن کا ذکر جتنا زیادہ ہوسکے کرنا چاہیے۔ یوم عرفات کے روز قرآن مجید کی تلاوت بھی نہایت افضل عمل ہے اور اسی طرح دعائے عرفات کا پڑھنا بھی بے پناہ اجر و ثواب کا باعث ہے۔ایسے مسلمان مرد و خواتین جو حج کی سعادت حاصل نہیں کر سکے وہ اس مبارک دن ان اعمال کو کر کے بے پناہ اجر و ثواب کے حقدار بن سکتے ہیں۔
