اسلام آباد (این این آئی) وفاقی وزیر خزانہ سینیٹر محمد اسحاق ڈار نے مصنوعی طور پر ڈالر کے مقابلے میں پاکستانی روپے کی قدر میں کمی کا سختی سے نوٹس لیتے ہوئے واضح کیاہے کہ ذمہ دار افراد اور اداروں کی نشاندہی اور قومی مفاد میں ان کیخلاف مناسب کارروائی کی جائیگی۔
بدھ کو وزیر خزانہ اسحاق ڈار نے فنانس ڈویژن حکام کے ہنگامی اجلاس کے دوران پاکستانی روپے کے مقابلے میں انٹر بنک ریٹ پر ڈالر کی قدر میں اضافے کا نوٹس لیتے ہوئے اس امر پر گہری تشویش کا اظہار کیا کہ بعض افراد، عناصر اور بنک حالیہ سیاسی صورتحال کا ناجائز فائدہ اٹھا رہے ہیں جو مصنوعی طور پر پاکستانی روپے کے مقابلے میں انٹر بنک ریٹ پر ڈالر کی قدر میں اضافے کا باعث بن رہا ہے۔ انہوں نے کہا کہ اس سے ہمارے غیر ملکی زرمبادلہ کے مارکیٹس پر منفی ثرات مرتب ہوئے ہیں۔ وزیر خزانہ نے کہا کہ ذمہ دار عناصر اورافراد کی نشاندہی کی جائے گی اور ان کے خلاف قومی مفاد میں مناسب کارروائی ہوگی۔
