بیجنگ (انٹرنیشنل ڈیسک) چین کے شہر یوئی یانگ کے اسپتال میں ماہرین نے ایک ایسی طبی پیش رفت کا اعلان کیا ہے جو قبل از وقت سفید ہونے والے بالوں سے پریشان افراد کے لیے خوشخبری ہے۔

بال سفید کیوں ہوتے ہیں؟

ماہرین کے مطابق بالوں کی جڑوں میں موجود میلانوسائٹ خلیے (Melanocyte Cells) بالوں کے قدرتی رنگ کے لیے میلانن نامی مادہ تیار کرتے ہیں۔ جب یہ خلیے غیر فعال ہو جاتے ہیں تو میلانن بننا بند ہو جاتا ہے اور بال سفید ہونا شروع ہو جاتے ہیں۔

نئی تحقیق

چینی سائنسدانوں نے دریافت کیا ہے کہ وٹامن بی 12 کی ایک خاص قسم ایڈینوسائل کوبالامن (Adenosylcobalamin) کو انجکشن کی شکل میں دینے سے یہ خلیے دوبارہ متحرک ہو جاتے ہیں اور میلانن کی پیداوار بحال ہو جاتی ہے۔

علاج کا طریقہ

تحقیق کے مطابق یہ انجکشن مریض کو ہفتے میں ایک بار لگایا جاتا ہے اور یہ کورس تقریباً تین سے چھ ماہ تک جاری رہتا ہے۔ اس عرصے میں بال بتدریج اپنی اصل سیاہ رنگت دوبارہ حاصل کرنے لگتے ہیں۔

ماہرین کا کہنا ہے کہ یہ دریافت خاص طور پر ان نوجوان مرد و خواتین کے لیے امید کی نئی کرن ہے جو کم عمری میں سفید بالوں کے مسئلے سے دوچار ہوتے ہیں۔