اسلام آباد(نیوز ڈیسک )متحدہ عرب امارات میں مقیم پاکستانی شہریوں کے لیے سفارتخانے کی ہیلپ لائن چوبیس گھنٹے کے لیے فعال کر دی گئی ہے۔
موجودہ علاقائی کشیدگی اور ایران، اسرائیل اور امریکا کے درمیان جاری صورتحال کے تناظر میں پاکستانیوں کو ہدایت کی گئی ہے کہ وہ کسی بھی ہنگامی صورت میں سفارتی حکام سے رابطہ کریں۔ابوظبی میں قائم پاکستانی سفارتخانے نے متعدد ایمرجنسی رابطہ نمبرز جاری کیے ہیں تاکہ ضرورت پڑنے پر فوری مدد فراہم کی جا سکے۔ اسی طرح دبئی میں پاکستانی قونصلیٹ نے بھی ہنگامی ہیلپ لائن نمبرز کا اعلان کیا ہے اور شہریوں سے اپیل کی ہے کہ کسی بھی مشکل یا غیر معمولی صورتحال میں فوراً متعلقہ حکام کو آگاہ کریں۔سفارتخانے کی جانب سے کمیونٹی کو مشورہ دیا گیا ہے کہ وہ احتیاطی تدابیر اختیار کریں، مقامی ہدایات پر عمل کریں اور سفارتی مشنز کے ساتھ مسلسل رابطے میں رہیں۔
