اسلام آباد (مانیٹرنگ ڈیسک)یوں تو ہر بچے کے والدین اس کے اچھے مستقبل اور خوشیوں کیلئے طرح طرح کی تکلیفیں اور دکھ برداشت کرتے ہیں مگر بھارت میں ایک مسلمان خاکروب ادریس نے اپنی بیٹیوں کے اچھے مستقبل اور انہیں اعلیٰ تعلیم دلوانے کے ساتھ ساتھ ان کی عزت نفس بچانے کیلئے ایسی مـثال قائم کر دی ہے جسے پڑھ اور سن کر ہر کوئی آبدیدہ ہو جاتا ہے۔
ٹائمز آف انڈیا کی ایک رپورٹ کے مطابق ادریس نے بتایا کہ میں نے خاکروبی کے پیشے سے حاصل ہونے والی آمدنی کی ایک ایک پائی اپنی بیٹیوں کو اعلیٰ تعلیم یافتہ بنانے کیلئے صرف کی تاکہ وہ معاشرے میں اعلیٰ مقام حاصل کر سکیں اور عزت کی زندگی گزاریں۔ پیشے کے لحاظ سے میں خاکروب ہوں اور میں نے یہ بات اپنی بیٹیوں سے ہمیشہ خفیہ رکھی تاکہ وہ کبھی کسی کے سامنے شرمندہ نہ ہوں۔کام سے فارغ ہو کر گھر جانے سے پہلے میں ہر روز کسی پبلک ٹوائلٹ میں غسل کرکے صاف ستھرا ہو کر گھر جایا کرتا تاکہ میری بیٹیوں کو میرے پیشے سے متعلق شک نہ ہو۔ ادریس کا کہنا تھا کہ ایک بارجب میرے پاس اپنی چھوٹی بیٹی کے کالج میں داخلے کیلئے رقم نہیں تھی تو میں مایوس ہو چکا تھا۔میرے ساتھیوں نے مجھے کوڑے کے ڈھیر کے پاس بیٹھ کر آنسو بہاتے دیکھا تو وہ سب میرے پاس آگئے۔ انہیں میرے رونے کی وجہ معلوم ہوئی تو سب نے اس دن کی مزدوری میرے ہاتھ پر رکھ دی۔ اب میری سب سے چھوٹی بیٹی کی بھی یونیورسٹی کی تعلیم مکمل ہونے والی ہے۔ اب وہ اکثر کھانا لے کر میرے ساتھیوں کے پاس جاتی ہے۔ وہ ان سے کہتی ہے کہ ’آپ لوگوں نے میری کالج کی فیس ادا کی تھی جسے میں کبھی بھی بھول نہیں سکتی۔‘میری بیٹیوں نے کامیابی سے اچھی تعلیم حاصل کی اور اب مجھے محسوس نہیں ہوتا کہ میں ایک غریب آدمی ہوں۔ اتنی اچھی اولاد کا باپ ہوتے ہوئے کوئی کیوں خود کو غریب محسوس کرے گا۔
