کرکٹ کی تاریخ یوں تو کئی ناقابل یقین واقعات سے بھری پڑی ہے، دنیا کے کھلاڑیوں نے کئی عالمی ریکارڈ اپنے نام کر رکھے ہیں مگر پاکستان کا ایک ایسا مایہ ناز بلے باز بھی ہے جس کو ننانوے رنز کی سنچری اپنے نام کرنے کا اعزاز حاصل ہے۔واقعہ کچھ یوں ہے کہ 1997میں دور ہ سری لنکا میں سائیڈ میچ کے دوران پاکستانی ٹیم بیٹنگ کر رہی تھی اور اس کی اننگز جاری تھی ۔کریز پر انضمام الحق موجود تھے،

پاکستانی ٹیم پلان کے مطابق اپنے مقررہ ہدف سے سکور اوپر لے جاچکی تھی اور اننگز ڈیکلیئر کرنے کا سوچا جا رہا تھا ۔ انتظار صرف اس بات کا تھا کہ انضمام الحق اپنی سنچری مکمل کریں تو اننگز ڈیکلیئر کی جائے۔جونہی گرائونڈ کے ایک جانب موجود سکور بورڈ پر انضمام کا سکور سو رنز دکھائی دیا تو کپتان نے اننگز ڈیکلیئر کر دی اور کھلاڑی واپس پویلین میں چلے گئے۔ کچھ دیر بعدجیسے ہی دوسری ٹیم نے اپنی اننگز کا آغاز کیا تو پتہ چلا کہ سکور بورڈ والے سے غلطی ہو گئی ہے اور اس نے انضمام الحق کی اننگز میں غلطی سے ایک رنز کا اضافہ کر دیا تھا جس کے باعث سکور بورڈ پر انضمام کا سکور 100رنز دکھایا گیا۔اب ایسا تو ہو نہیں سکتا تھا کہ انضمام الحق کو 100رنز مکمل کرنے کیلئے دوبارہ بیٹنگ دی جاتی توسکور بورڈ والے کی اس غلطی کے مداوے کے طور پر انضمام الحق کو ایک رنز بغیر کھیلے دیتے ہوئے فیصلہ کیا گیا کہ چونکہ پاکستانی ٹیم کی اننگز ڈیکلیئریشن کی غیر اعلانیہ شرط ہی انضمام الحق کی سنچری رکھی گئی تھی تو انضمام الحق کے فرسٹ کلاس کیرئیر میں اس اننگز کو سنچری ہی لکھا جائے۔ یوں انضمام الحق دنیا کے واحد بلے باز ہیں جن کے کیرئیر میں ننانوے رنز کی ایک سنچری جڑی ہوئی ہے۔