بغداد(آئی این پی)ترکی نے عراق سے اپنی فوج واپس بلانے پر رضا مندی ظاہر کردی،اس معاملے پر دونوں ممالک کے تعلقات سخت کشیدہ تھے اور عراق کی اعلیٰ قیادت نے اس سلسلے میں ترکی کیخلاف انتہائی سخت اقدامات اٹھانے کا عندیہ دیاتھا،ترک وزیراعظم بن علی یلدرم نے بغداد کے دورے کے موقع پر عراق کے شمالی علاقے سے اپنے فوجیوں کے انخلا سے اتفاق کیا ہے اور اس سلسلے میں دونوں ملکوں کے درمیان ایک سجھوتا طے پا گیا ۔غیر ملکی میڈیا کے مطابق وزیراعظم حیدر العبادی نے اس سمجھوتے کی تصدیق کی ہے۔
ترک وزیراعظم گزشتہ روز سرکاری دورے پر بغداد پہنچے تھے۔انھوں نے عراقی وزیراعظم حیدرالعبادی سے ملاقات کی ۔عراقی وزیراعظم حیدر العبادی نے اپنے ترک ہم منصب بن علی یلدرم سے ملاقات کے بعد کہاکہ ترکی کے ساتھ معاہدہ طے پا گیا ہے، جس کے تحت انقرہ حکومت شمالی عراق میں تعینات اپنی فوجیں واپس بلا لے گی۔ترک وزیراعظم نے صدر فواد معصوم اور پارلیمان کے اسپیکر سلیم الجبوری سے بھی ملاقات کی ۔۔وہ عراق کی مختلف سیاسی جماعتوں کے عہدہ داروں ،رائے عامہ کے لیڈروں اور عراق میں آباد ترکمانوں کے نمائندوں سے بھی ملاقات کریں گے۔ وہ اس کے بعد عراق کے خود مختار شمالی علاقے کردستان کے دارالحکومت اربیل بھی جائیں گے جہاں وہ علاقائی صدر مسعود بارزانی اور وزیراعظم نوشیرواں بارزانی سے ملاقات کریں گے۔ترک وزیراعظم کے ساتھ وزیردفاع فکری اثیق ،وزیر تعلیم عصمت یلماز ،توانائی اور انسانی وسائل کے وزیر بیرت البیرق ، اقتصادی امور کے وزیر نہاد زبکا اور کسٹمز اور تجارت کے وزیر بلند تونکجا پر مشتمل اعلی سطح کا وفد بھی عراق کے سرکاری دورے پر آیا ہے۔ ترکی نے اپنے فوجی دستے عراقی شہر موصل کے شمال میں بعشیقہ کے علاقے میں تعینات کر رکھے ہیں۔
