اسلام آباد(آئی این پی)عوامی مسلم لیگ کے سربراہ رکن قومی اسمبلی شیخ رشید احمد نے کہا ہے کہ سپیکر قومی اسمبلی ایوان میں حکومت کی نمائندگی کر رہے ہیں ‘ پانامہ کیس میں جدوجہد کا پھل نہ بھی ملا تو بھی کرپشن کے خلاف جنگ جاری رکھیں گے اور حکومت کےخلاف یہ نئی جنگ ہوگی۔
وہ جمعرات کو پارلیمنٹ ہاؤس کے باہر میڈیا سے بات چیت کر رہے تھے۔ انہوں نے کہا کہ سانحہ اے پی ایس کے زخم آج بھی تازہ ہیں ۔ مسلح افواج دہشت گردیوں کے خلاف جنگ لڑ رہے ہیں۔ انشاء اللہ دہشت گردی پر قابو پا لیں گے۔ شیخ رشید نے کہا کہ اسمبلی میں چور اور ڈاکو بیٹھے ہوئے ہیں جب تک ملک میں انصاف نہیں ہو گا سقوط ڈھاکہ ہوتے رہیں گے۔ انہوں نے کہاکہ سپیکر نے قومی اسمبلی میں شاہ محمود قریشی کو اسمبلی میں بولنے کی اجازت نہ دے کر جانبداری کا ثبوت دیا اور حکومت کی نمائندگی کی ۔ سپیکر کو کچھ خیال کرنا چاہیے۔
