نئی دہلی (این این آئی)بھارتی ریاست مغربی بنگال میں پولیس نے ایک کارروائی کے دوران سابق بس ڈرائیور مینار منڈل کے گھر سے 28 کروڑ روپے نقد اور 15 کلو سونا برآمد کر لیا،
بھاری مقدار میں نقد رقم کے باعث نوٹ گننے والی 5 مشینیں بھی کام کرنا چھوڑ گئیں۔بھارتی میڈیا کے مطابق مینار منڈل پتھروں کے معروف تاجر تلو منڈل کا قریبی رشتے دار ہے جسے سابق ترنمول کانگریس رہنما انوبرت منڈل کا قریبی ساتھی بھی بتایا جاتا ہے۔چھاپہ رات گئے مارا گیا جہاں ابتدائی طور پر ساڑھے 5 کروڑ روپے نقد اور 15 کلو سونا برآمد ہوا جبکہ بعد ازاں پوچھ گچھ اور گھر میں توڑ پھوڑ کرنے کے بعد مجموعی برآمدگی 28 کروڑ روپے تک پہنچ گئی۔پولیس نے مینار منڈل کو گرفتار کر لیا ہے۔پولیس کا کہنا تھا کہ دورانِ تفتیش مینار منڈل نے اعتراف کیا ہے کہ برآمد ہونے والی نقد رقم اور سونا تلو منڈل اور اس کے مبینہ غیر قانونی مافیا نیٹ ورک کا ہے۔
بھارتی پولیس کے حکام کے مطابق مینار منڈل پہلے ریاستی ٹرانسپورٹ کے محکمے میں بس ڈرائیور تھا، بعد میں پتھروں کے کاروبار سے وابستہ ہوا، اس کی آمدنی کے ذرائع پر تحقیقات جاری ہیں۔ اس کارروائی کے بعد ترنمول کانگریس کے مختلف دھڑوں کے رہنماں نے ایک دوسرے پر الزامات عائد کرنا شروع کر دیے ہیں اور مطالبہ کیا ہے کہ اس معاملے میں تمام بااثر افراد کے کردار کی غیر جانبدارانہ تحقیقات کی جائیں۔دوسری جانب اس کارروائی کے بعد 2024 میں ہونے والی تلو منڈل کی بیٹی کی شاہانہ شادی بھی دوبارہ موضوعِ بحث بن گئی۔بھارتی میڈیا کے مطابق اس تقریب پر تقریبا 100 کروڑ روپے خرچ کیے گئے تھے جس میں فلمی شخصیات سمیت متعدد معروف مہمان شریک ہوئے تھے۔
