اسلام آباد (نیوز ڈ یسک) سندھ حکومت نے صوبے بھر کے سرکاری اور نجی تعلیمی اداروں کے لیے ہفتہ وار تعطیل کے حوالے سے نئی پالیسی نافذ کرنے کا اعلان کر دیا ہے۔
نئے فیصلے کے تحت یکم اگست 2026 سے اسکولوں اور کالجوں میں ہفتے کے روز بھی تدریسی سرگرمیاں جاری رہیں گی۔محکمہ تعلیم سندھ کی جانب سے جاری کیے گئے نوٹیفکیشن کے مطابق ہفتے کی چھٹی ختم کر دی گئی ہے، جس کے بعد تمام تعلیمی ادارے پیر سے ہفتہ تک ہفتے میں چھ دن کھلے رہیں گے۔اعلامیے میں بتایا گیا ہے کہ یکم اگست سے نئے تعلیمی سال 2026-27 کا باقاعدہ آغاز بھی ہوگا، جبکہ اسی تاریخ سے نیا تدریسی شیڈول بھی نافذ العمل ہو جائے گا۔
یاد رہے کہ سندھ حکومت نے موسمِ گرما کی تعطیلات یکم جون سے 31 جولائی 2026 تک مقرر کی تھیں، جو اب اختتام پذیر ہو رہی ہیں۔محکمہ تعلیم نے تمام سرکاری اور نجی تعلیمی اداروں کی انتظامیہ کو ہدایت جاری کی ہے کہ وہ نئے اوقاتِ کار اور ہفتے میں چھ روزہ تدریسی نظام پر مکمل عمل درآمد کو یقینی بنائیں اور مقررہ شیڈول کے مطابق کلاسز کا انعقاد کریں۔
