اسلام آباد(آئی این پی)عوامی مسلم لیگ کے سربراہ اور رکن قومی اسمبلی شیخ رشید احمد نے کہا ہے کہ تحریک انصاف نے پارلیمان کے بائیکاٹ کے معاملے پر مجھ سے مشورہ نہیں کیا ‘ میں اس کے حق میں نہیں تھا ‘ بائیکاٹ کا تحریک انصاف سے ہی پوچھا جائے۔ وہ بدھ کو پارلیمنٹ ہاؤس کے باہر میڈیا سے بات چیت کر رہے تھے۔ انہوں نے کہاکہ عمران خان سے دوستی ہے لیکن ان کی اپنی سیاسی جماعت ہے میری اپنی۔
پارلیمنٹ کے بائیکاٹ کا فیصلہ ان کی پارٹی کا اپنا فیصلہ تھا۔ اس معاملے پر مجھ سے مشورہ نہیں کیا گیا۔ میں پارلیمنٹ کے بائیکاٹ کے حق میں نہیں تھا۔ پہلے بائیکاٹ اور اب واپسی کے معاملے کا تحریک انصاف سے ہی پوچھا جائے۔ شیخ رشید احمد نے کہاکہ پاکستان میں صرف عمران خان اور میں ہی اپوزیشن کا کردار ادا کر رہے ہیں۔ اپوزیشن کے طور پر عوام کے پاس ہمارے علاوہ کوئی تیسرا آپشن نہیں ہے۔
