نیویارک ( آن لائن ) امریکی شہر نیویارک میں مقیم مسلمان طالبہ پر تین افراد نے حملہ کردیا اور حجاب اتارنے کی کوشش کی۔امریکہ میں نومنتخب صدر ڈونلڈ ٹرمپ کی کامیابی کے بعد سے امریکہ میں مقیم مسلمانوں بالخصوص حجاب پہننے والی خواتین اورلڑکیوں پر حملوں میں تیزی سے اضافہ ہورہا ہے۔ایک ایسا ہی واقعہ نیویارک کے علاقت مین ہٹن کے سب وے میں پیش آیا، جہاں ایک مسلم طالبہ یاسمین سوید پر زیر زمین ٹرین میں سفر کے دوران شراب کے نشے میں دھت تین سفید فام امریکیوں نے حملہ کیا اور اسے دہشت گرد قرار دیتے ہوئے اس کا حجاب اتارنے کی کوشش کی۔
یاسمین سوید کا کہنا تھا کہ میں نے انھیں بات کرتے ہوئے سنا لیکن ہیڈ فون کے باعث واقعی میں سن سکی اور جب وہ قریب آئے تو میں نے واضح طور پر انہیں ڈونلڈ ٹرمپ کہتے ہوئے سنا۔مسلم باروچ کالج کی طالبہ کا کہنا تھا کہ اس دوران مین ہٹن سے گزرتی ہوئی ٹرین میں موجود کوئی شخص اس کی مدد کو نہیں آیا جبکہ اس دوران تینوں ملزمان ڈونلڈٹرمپ کے حق اوراسلام مخالف نعرے لگارہے تھے۔یاسمین سوید نے بتایا اس نے خوفزدہ ہوکرایک ہاتھ سرپر رکھ لیا تاکہ حملہ آور ان کا اسکارف نہ کھینچ لیں اور ٹرین کی بوگی میں دوسری جگہ جاکر جان بچائی۔دوسری جانب نیویارک پولیس نے اس واقعے کی تحقیقات کررہی ہے۔