اسلام آباد(مانیٹرنگ ڈیسک) چیئرمین کشمیر کمیٹی مولانا فضل الرحمان نے کہا ہے کہ بھارت مقبوضہ کشمیر میں انسانی حقوق کی شدید خلاف ورزیاں کررہا ہے، یہ مسئلہ کشمیر کو مزید پیچیدہ بنانے کی ایک سوچی سمجھی سازش ہے۔جمعرات کو سرکاری ٹی وی سے گفتگو کرتے ہوئے جے یو آئی ف کے سربراہ مولانا فضل الرحمان نے کہا کہ وزیراعظم محمد نواز شریف نے اقوام متحدہ کی جنرل اسمبلی میں مسئلہ کشمیر کو بھرپور اور مؤثر طریقے سے اٹھایا، عالمی برادری کو بتایا کہ بھارتی افواج مقبوضہ کشمیر میں نہتے کشمیریوں پر ظلم و بربریت کی انتہاء کررہی ہیں اور نوجوان، بچوں اور بچیوں پر پیلٹ گن کا بیجا استعمال کرکے ان کی بینائی چھین رہا ہے جو کہ انسانی حقوق کی سراسر خلاف ورزی ہے، وزیراعظم محمد نواز شریف کے مسئلہ کشمیر کو بہترین انداز میں عالمی برادری کے سامنے پیش کرنے کی وجہ سے ہی بھارت کو پریشانی لاحق ہے اور وہ بوکھلاہٹ میں ایسی حرکتیں کررہا ہے،ایک سوال کے جواب میں انہوں نے کہا کہ بھارتی وزیراعظم نریندر مودی کی مسلمان دشمنی کسی سے ڈھکی چھپی نہیں اور اس نے اپنا الیکشن بھی مسلمان دشمنی پر ہی لڑا، اب تک وہ جو کررہا ہے اس کے خلاف بھارت میں بھی آوازیں اٹھنا شروع ہوگئی ہیں اور لوگ ان کیخلاف وہاں بڑے بڑے جلسے بھی کررہے ہیں، جس کا مقصد ہے کہ عوام بھارتی حکومت کی پالیسیوں سے متفق نہیں لیکن پاکستان میں ایک یکجہتی پائی جاتی ہے اور یہی یکجہتی ہماری اصل طاقت ہے۔مولانا فضل الرحمان کا کہنا تھا کہ اقوام متحدہ میں بھارت کی طرف سے مقبوضہ کشمیر کو اٹوٹ انگ کہنا اقوام متحدہ کی قراردادوں کی بھی خلاف ورزی ہے۔

موضوعات:مولانافضل الرحما ن