پشاور(این این آئی)خیبر پختونخوا اسمبلی نے ہرسال آٹھ جولائی کو عبدالستار ایدھی کی یوم وفات پرچیرٹی ڈے منانے کی قرارداد کو متفقہ طور پر منظور کر لی ۔خیبرپختونخوا اسمبلی کا اجلاس اسپیکر اسدقیصر کی زیر صدارت منعقد ہوا ،اجلاس میں آٹھ جولائی کو چیئرٹی ڈے منانے کے حوالے سے قرارداد منظور کر لی گئی،قرار داد پی ٹی آئی کی رکن اسمبلی زرین ضیا نے پیش کی ،قرار داد میں کہا گیا کہ ایدھی بابائے خدمت تھے اور ان کی خدمات کو کبھی نہیں بھلایا جاسکتا ،اجلاس میں سمال ڈیم کیالہ گوڈہ ایبٹ آباد پر توجہ دلاؤ نوٹس بھی پیش کیا گیا ،جس میں کہا گیا کہ کیالہ گوڈہ ڈیم کے متاثرین کو4سال میں اراضی کامعاوضہ نہیں ملا،حکومت نے ڈیم کی تعمیر میں پھلداراورقیمتی عمارتی لکڑی کے درختوں کوبھی کاٹ دیاہے،متعلقہ کمیشنر کے پاس رقم موجود ہے لیکن ڈیم کے متاثرین کو نہیں دے رہا،توجہ دلاؤ نوٹس پی ایم ایل این کے رکن اسمبلی اورنگزیب نلوٹھانے پیش کیا ،سپیکر نے آئندہ ہونیوالے اجلاس میں صوبے میں افغان مہاجرین کودرپیش مسائل پربحث اورتمام سیاسی جماعتوں کے موقف کواپنا موقف اسمبلی فلور پر پیش کرنے کی ہدایت کردی۔بعدازاں اسمبلی کا اجلاس جمعے کے روز تک ملتوی کردیا گیا۔