لاہور ( مانیٹرنگ ڈیسک) صدر مملکت ممنون حسین نے کہا ہے کہ سیاست میں آنے کا کوئی ارادہ نہیں تھا بلکہ میں کرکٹر بننا چاہتا تھا ۔ ان خیالات کا اظہار انہوں نے پاکستان ٹیلی ویژن کے پروگرام ’’کھوئے ہووٗں کی جستجو ‘‘میں گفتگو کرتے ہوئے کیا ۔پروگرام میں صدرِ مملکت اور خاتونِ اوّل بیگم محمودہ ممنون حسین کو بطور مہمان مدعو کیا گیا تھا ۔معروف ادیب ،شاعر اور کالم نگار عطاا لحق قاسمی شریک گفتگو تھے۔صدر مملکت ممنون حسین نے بتایا کہ والد صاحب کی خواہش پر ایک فیملی فرینڈ کی الیکشن مہم میں بھر پور حصہ لیا اور وہ کراچی میں سب سے زیادہ ووٹ لینے میں کامیاب ہو گئے اوراس کے بعد عملی سیاست میں سفر کا آغاز ہوگیا اور1967-68 میں مجھے پاکستان مسلم لیگ کراچی کا جوائنٹ سیکریٹری بنا دیا گیا ۔کراچی میں پارٹی دفاترکو آرگنائز کرنے میں اہم کردار ادا کیا مگر سیاست میں دلچسپی نا ہونے کی وجہ سے عہدے سے استعفیٰ دے دیا ۔ 1993میں جب محمدنواز شریف کی جمہوری حکومت کو ہٹایا گیا تووہ کراچی آئے اوران کی خواہش پر میں اپنے دوست کے ساتھ ان سے ملنے گیا ،انہوں نے چیمبر آف کامرس میں ہڑتال کروانے پر میرا شکریہ ادا کیا۔پارٹی کیلئے میری گزشتہ خدمات جاننے کے بعداگلے دن پھرمیاں صاحب نے بلایا اور پارٹی کیلئے پھر سے سر گرم ہونے کیلئے کہا اور اس طرح ایک بار پھر عملی سیاست کا آغاز کر دیا ۔