نئی دہلی(این این آئی) امریکی طیارہ ساز کمپنی لاک ہیڈ مارٹن نے کہا ہے کہ وہ بھارتی فضائیہ کے تعاون سے جدید ترین ایف 16طیارے، بھارت میں تیار کرنے کرنے کے لیے پوری طرح آمادہ ہے۔پاکستان کو ایف سولہ طیاروں کی فروخت پر بھارتی اعتراض کے بارے میں بھارت اور امریکا کی حکومتوں کے درمیان یہ معاملہ حل ہونا چاہیے۔غیرملکی خبررساں ادارے کے مطابق لاک ہیڈ مارٹن کے ڈائریکٹر ٹریڈ پروموشن رینڈل ایل ہاورڈ نے اپنے بیان میں کہا کہ بھارت اور دیگر ملکوں کی طلب پورا کرنے کے لیے جدید ترین ایف 16طیاروں کی پروڈکشن لائن ٹیکساس سے بھارت منتقل کرنے کی تجویز زیرغور ہے۔ انھوں نے بھارت کو دی جانے والے اس پیشکش کو انتہائی غیرمعمولی قرار دیتے ہوئے کہا کہ ایف 16 طیارے نہ صرف بھارت میں تیار ہوں گے بلکہ بھارتی فضائیہ انھیں استعمال بھی کر سکے گی۔ انھوں نے پاکستان کو ایف سولہ طیاروں کی فروخت پر بھارتی اعتراض کے بارے میں کہا کہ یہ معاملہ بھارت اور امریکا کی حکومتوں کے درمیان حل ہونا چاہیے۔