نئی دہلی (مانیٹرنگ ڈیسک)بھارت میں گزشتہ دو روز میں آسمانی بجلی گرنے کے واقعات کے نتیجے میں 100 افراد ہلاک ہو گئے ۔ بھارت میں مون سون کی تباہ کاریاں بھی جاری ہیں۔بھارتی وزیراعظم نریندر مودی نے ان ہلاکتوں پر گہرے دکھ کا اظہار کیا ہے۔بھارتی ٹی وی کے مطابق مون سون کی وجہ سے بھارت بھر میں شدید بارشوں کا سلسلہ جاری ہے، جب کہ بہار ریاست میں آسمانی بجلی کی زد میں آ کر درجنوں افراد ہلاک ہوئے ۔بھارت میں مون سون کے دوران آسمانی بجلی گرنے کے واقعات عمومی ہیں، تاہم اس بار ان واقعات کے نتیجے میں ہونے والی ہلاکتیں غیرمعمولی حد تک زیادہ ہیں۔ان میں زیادہ تر ہلاکتیں بھارتی ریاست بہار میں ہوئیں ہیں، جہاں آسمانی بجلی کم از کم 56 افراد کی موت کا باعث بنی، جب کہ دیگر 44 افراد برقی کنڈوں کی زد میں آ کر زخمی بھی ہوئے ۔ آسمانی بجلی گرنے کے زیادہ تر واقعات دیہی علاقوں میں پیش آئے۔بہار میں قدرتی آفات سے نمٹنے والے سرکاری ادارے کے ایک سینیئر عہدیدار انیرودھ کمار نے کہاکہ ہلاک شدگان کی تعداد 56 تک پہنچ چکی ہے، جب کہ 28 افراد زخمی ہوئے ۔ آسمانی بجلی کا نشانہ بننے والوں میں زیادہ تر تعداد بچوں اور خواتین کی ہے۔ بھارتی ریاستوں اترپردیش، جھاڑکھنڈ اور مدھیہ پردیش میں آسمانی بجلی کا شکار بننے والے افراد کی مجموعی تعداد 44 رہی۔بھارتی وزیراعظم نریندر مودی نے ان ہلاکتوں پر گہرے دکھ کا اظہار کیا ہے۔