اسلام آباد (نیوز ڈیسک)حکومت پنجاب نے صوبے کے تمام اضلاع میں ماہانہ بنیادوں پر صفائی فیس عائد کرنے کی منظوری دے دی ہے۔ اس فیصلے کے مطابق رہائشی علاقوں میں کم از کم 200 روپے ماہانہ فیس لی جائے گی، جبکہ کاروباری علاقوں میں یہ فیس زیادہ سے زیادہ 5 ہزار روپے تک ہوسکتی ہے۔ذرائع کے مطابق، پنجاب کے محکمہ بلدیات کے ترجمان کا کہنا ہے کہ شہری اور دیہی علاقوں میں صفائی فیس کی شرح مختلف ہوگی۔ رہائشی علاقوں میں یہ فیس نسبتاً کم رکھی گئی ہے، جبکہ تجارتی علاقوں میں اس میں اضافہ کیا گیا ہے تاکہ وسائل کی بہتری ممکن ہو سکے۔

مزید بتایا گیا کہ بلوں کی ترسیل اور ادائیگی کا نظام بتدریج ڈیجیٹل کیا جائے گا۔ تاہم، آغاز میں دو ماہ کے بلز کاغذی شکل میں فراہم کیے جائیں گے۔ ترجمان نے بتایا کہ شہری اس فیس کو ایک موبائل ایپ کے ذریعے آن لائن بھی ادا کرسکیں گے۔ایسے افراد جو ایپ استعمال نہیں کرتے، ان سے صفائی کی فیس متعلقہ کمپنیوں کے سپروائزرز کے ذریعے وصول کی جائے گی۔ یاد رہے کہ “ستھرا پنجاب” کے تحت گزشتہ آٹھ ماہ سے صفائی کی سرگرمیاں جاری ہیں، تاہم اب تک اس پر کسی قسم کا چارج نہیں لگایا گیا تھا۔اب حکومت نے فیصلہ کیا ہے کہ ان خدمات کے بدلے باقاعدہ فیس وصول کی جائے گی، اور ابتدائی ہدف پہلے سال میں 15 ارب روپے وصول کرنے کا رکھا گیا ہے۔