سکھر (نیوزڈیسک) قومی اسمبلی میں قائدحزب اختلاف اور پاکستان پیپلزپارٹی کے رہنما سید خورشید احمدشاہ نے کہا ہے کہ وزیراعظم کو امریکا جانے سے قبل جماعتوں کو اعتماد میں لینا چاہیے۔ کالاباغ ڈیم معاملے پر حکومت مزید مسائل میں پھنس جائے گی۔ سکھر میں میڈیا سے بات چیت کرتے ہوئے سید خورشاہ نے کہا کہ حکومت کو ایف آئی اے کو دیئے گئے اضافی اختیارات کے ضابطہ اخلاق کا جائزہ لینا ہوگا۔ کالاباغ ڈیم کے حوالے سے پوچھے گئے سوال کے جواب میں سید خورشیدشاہ نے کہا کہ کالاباغ ڈیم کو تین صوبوں نے اکثریت سے مسترد کردیا ہے اب ایک بار پھر کالاباغ ڈیم کے مردہ گھوڑے کو زندہ کرکے حکومت مزید مسائل میں پھنس جائے گی۔ ڈاکٹر عاصم کے حوالے سے پوچھے گئے سوال کے جواب میں انہوںنے کہا کہ ڈاکٹر عاصم کے خلاف کوئی کارروائی سامنے نہیں آئی ہے، ڈاکٹر عاصم سے کوئی رابطہ نہیں ہے۔ انہوںنے کہا کہ وزیراعظم کو امریکا جانے سے قبل پارلیمانی جماعتوں کو اعتماد میں لینا چاہیے۔