اسلام آباد (نیوز ڈیسک)پنجاب حکومت نے صوبے بھر میں سولر پینلز کی تنصیب کے حوالے سے نئی پالیسی نافذ کر دی ہے، جس کے تحت اب مخصوص قواعد و ضوابط کی پابندی لازمی قرار دی گئی ہے۔پنجاب ڈیزاسٹر مینجمنٹ اتھارٹی (PDMA) کی جانب سے جاری کردہ گائیڈ لائنز میں واضح کیا گیا ہے کہ سولر سسٹمز صرف وہی افراد یا کمپنیاں نصب کریں گی جو متبادل توانائی کے ترقیاتی بورڈ سے باقاعدہ طور پر منظور شدہ ہوں۔

ڈی جی پی ڈی ایم اے، عرفان علی کاٹھیا نے کہا ہے کہ اسکولوں، اسپتالوں، دفاتر اور دیگر حساس سرکاری عمارتوں پر پہلے سے لگے سولر پینلز کا فوری معائنہ کروایا جائے گا تاکہ کسی بھی قسم کے حادثے یا نقصان کے خطرے کو کم کیا جا سکے۔ان کا کہنا تھا کہ سولر پینلز کے ناقص یا غیر معیاری تنصیب کی صورت میں شدید خطرات لاحق ہو سکتے ہیں، اسی لیے ماہرین کی خدمات لینا ناگزیر ہے۔پی ڈی ایم اے نے تمام متعلقہ اداروں کو ہدایت دی ہے کہ وہ حفاظتی پہلوؤں کو مدنظر رکھتے ہوئے فوری طور پر موجودہ تنصیبات کا جائزہ لیں اور جہاں ضرورت ہو، اصلاحی اقدامات اٹھائیں۔یاد رہے کہ گزشتہ ماہ ہی پی ڈی ایم اے پنجاب نے سولر پینلز کی تنصیب سے متعلق پالیسی سازی کا عمل شروع کیا تھا، جس کا مقصد محفوظ، مستند اور معیاری تنصیب کو یقینی بنانا ہے۔