اسلا م آباد (نیوز ڈیسک )مراکش کے بادشاہ محمد ششم نے عیدالاضحیٰ کے موقع پر عوام سے درخواست کی ہے کہ وہ اس سال قربانی نہ کریں۔ یہ پیغام وزیر اوقاف و اسلامی امور احمد التوفیق کے ذریعے سرکاری میڈیا پر جاری کیا گیا ہے۔
بادشاہ نے کہا ہے کہ ملک شدید معاشی بحران اور موسمیاتی تبدیلیوں کی وجہ سے مویشیوں کی تعداد میں کمی کا سامنا کر رہا ہے، جس سے مویشیوں کی افزائش نسل بھی متاثر ہو رہی ہے۔ موجودہ مشکل حالات میں قربانی کے جانور خریدنا تنخواہ دار اور متوسط طبقے کے لیے بہت بوجھ بن سکتا ہے، اس لیے عوام سے اپیل ہے کہ وہ اس سال قربانی کی سنت ادا نہ کریں ۔
بادشاہ نے یہ بھی واضح کیا کہ قربانی سنت مؤکدہ ہے، مگر دین میں موجودہ حالات میں رعایت دی جا سکتی ہے۔ انہوں نے اپنی طرف سے دو بھیڑیں قربان کرنے کا اعلان بھی کیا تاکہ قربانی کی روح برقرار رہے۔
بادشاہ کی اس اپیل کے بعد ملک بھر کی مویشی منڈیاں خالی ہو گئیں اور سوشل میڈیا پر ایسی ویڈیوز بھی گردش کر رہی ہیں جن میں مبینہ سرکاری اہلکار گھروں سے بھیڑیں ضبط کرتے دکھائی دے رہے ہیں، جس سے عوام میں تشویش اور ناراضگی پیدا ہو گئی ہے۔ خیال رہے کہ مراکش کو پچھلے سات سال سے خشک سالی کا سامنا ہے، جو اس فیصلے کی اہم وجہ بنی ہے۔
